Andijon viloyati Xo‘jaobod tumanidan o‘tuvchi xalqaro ahamiyatga ega A-373 avtomobil yo‘lining 457-kilometrida o‘lim bilan bog‘liq transport hodisasi sodir etildi, deya xabar bermoqda YHXBB.
Ma’lum bo‘lishicha, YTH Xo‘jaobod tumani, “Chiroqchi” MFY, Sohibkor ko‘chasida yashovchi 2001-yilda tug‘ilgan Sirojiddinov Xurshidbek Davronbek o‘g‘li tomonidan Spark rusumli 60 Q 725 OA davlat raqam belgili avtomashinani boshqarib ketayotgan vaqtida sodir etilgan.
Haydovchi avtomobil yo‘lining belgilanmagan joyidan kesib o‘tayotgan Xo‘jaobod tumani, “Ipakchilik” MFY, Ahillik ko‘chasida yashagan, tuman xalq ta’lim bo‘limiga qarashli 14-umumta’lim maktab o‘qituvchisi Isoqova Shahzoda Mamajonova hamda uning o‘g‘li 2012-yilda tug‘ilgan, 14-maktabning 2-sinf o‘quvchisi Tohirov Hojiakbar Qurbonboy o‘g‘lini urib yuborgan.
Oqibatda Isoqova Shahzoda voqea joyida vafot etgan. Uning o‘g‘li Tohirov Hojiakbar og‘ir tan jarohati olib, shifoxonada hayotdan ko‘z yumgan.
Hodisa sabablarini o‘rganish natijasida voqea sodir bo‘lgan hudud aholi yashash joyi bo‘lsa-da, tungi yoritish chiroqlari bilan yoritilmagani, shuningdek, 2019-yilda haydovchilik guvohnomasini olgan haydovchining malakasi yetarli emasligi va belgilanganidan yuqori tezlikda harakatlangani aniqlangan.
Holat bo‘yicha Xo‘jaobod IIB huzuridagi Tergov bo‘limi tomonidan jinoyat ishi qo‘zg‘atilib, tezkor surishtiruv harakatlari olib borilmoqda.
Avvalroq Buxoroda Lacetti yo‘lni kesib o‘tayotgan ota-bolani urib ketgani, Popda Lacetti’ning Damas’ga urilishi oqibatida bir kishi vafot etgani hamda Farg‘onada Spark daraxtga urilishi natijasida haydovchi va yo‘lovchi vafot etgani haqida xabar qilingandi.
Izoh (0)