Florida shtatida yashovchi oila idish ichidan Kubaga yopirilgan halokatli “Irma” to‘foni vaqtida yozilgan maktubni topib oldi, deb xabar beradi UPI.
Keti Bodiford qarindoshlari bilan plyajda sayr qilib yurib, ichida maktub bor plastik idishni topib olgan. U plastikni qirqib, ichidan maktubni ehtiyotkorlik bilan olgan. Ma’lum bo‘lishicha, ushbu maktubni 2017-yilda beshinchi darajali to‘fon yopirilgan vaqtida kubalik bolakay yozgan. “Maktubni kimdir topib olishiga, chin ko‘ngildan umid qilaman”, — deyiladi xatda.
Maktub muallifi butilkani siklon yopirilgan vaqtda okeanga tashlamoqchi bo‘lgan. “Bolakay shu qadar jasur bo‘lgani va kuchli shamolga qaramay okeanga borishdan qo‘rqmagani hayratlanarli”, — deydi Bodiford.
Amerikalik o‘zining topilmasini Facebook’dagi sahifasida e’lon qilib, uning muallifini topilishiga umid qilmoqda.
“Irma” to‘foni 2017-yilning sentabrida Kuba, Puerto-Rika, Dominikan va AQShga yopirilgan edi. U 55 kishining o‘limiga sababchi bo‘lgan.
Avvalroq Fransiyada 110 yil avval kabutar yo‘qotgan nemis zobitining maktubi topilgani to‘g‘risida xabar berilgandi.
Izoh (0)