Turkiya prezidenti Rajab Toyyib Erdo‘g‘on mamlakatda koronavirus tufayli yangi cheklov choralarini e’lon qildi, deb yozadi Meduza.
Savdo markazlari, bozorlar va sartaroshxonalar faqat kunduzgi vaqtda — 10:00 dan 20:00 gacha ishlashi mumkin. Bar va restoranlar yegulik va ichimliklarni uyga olib ketish uchungina ishlaydi. Barcha kinoteatrlar kamida yil oxirigacha yopiladi, maktablar masofaviy ta’limga o‘tkaziladi.
Dam olish kunlari Turkiyada komendantlik soati e’lon qilindi, 20:00 dan 10:00 gacha ko‘chaga chiqish taqiqlanadi.
So‘nggi kunlarda Turkiyada har kuni koronavirusga chalinish bilan bog‘liq uch mingdan ortiq holat qayd etilmoqda; bu raqam tez o‘smoqda — oktabr oxirida har kungi ko‘rsatkich ikki ming kishidan oshmayotgan edi. Apreldagi avj nuqta vaqtida Turkiyada kuniga 4,5 mingdan ziyod kishi kasallanayotgan edi.
Avvalroq Turkiyada 12-noyabrdan odam ko‘p to‘planadigan ko‘chalar va jamoat transportlari bekatlarida sigaret chekish taqiqlangan edi.
Eslatib o‘tamiz, sentabr oyi boshlarida Turkiya sog‘liqni saqlash vaziri Faxriddin Koja mamlakat koronavirus infeksiyasi tarqalishining ikkinchi to‘lqinini boshidan o‘tkazayotganini ma’lum qilgandi. O‘shanda vazir kasallar sonining ortishiga dam oluvchilar profilaktika choralariga yaxshi rioya qilmayotganini sabab qilib ko‘rsatgan. Mamlakat iqtisodiyoti pandemiya sababli rekord darajada pasaygan.
So‘nggi ma’lumotlarga ko‘ra, Turkiyada pandemiya boshidan buyon 421,4 ming kishi koronavirusga chalingan, 11,7 ming nafari vafot etgan, yana 359 ming bemor sog‘aygan.
Izoh (0)