Rossiya Senati Putinga rus harbiylarini Qorabog‘ga kiritishga ruxsat berdi. Harbiylar sakkiz kun avval Qorabog‘ga kirib bo‘lgan

Federatsiya Kengashi (Senat) Rossiya prezidentiga 10-noyabrdan Tog‘li Qorabog‘ga zaruriy qurollanish va maxsus texnikalarga ega tinchlikparvar harbiy kontingentni yo‘naltirishga ruxsat berdi.

Bu boradagi tegishli qaror 18-noyabr kuni bo‘lib o‘tgan parlament yuqori palatasining 492-yig‘ilishida qabul qilingan. Uni ovoz berish jarayonlarida ishtirok etgan 129 senatorning barchasi qo‘llab-quvvatladi.

Rossiyalik tinchlikparvarlarni Tog‘li Qorabog‘ga kiritish bo‘yicha qaror 10-noyabr kuni Armaniston va Ozarbayjon o‘rtasidagi o‘t ochishni to‘xtatish bo‘yicha imzolangan bitim doirasida qabul qilingan. Rossiyalik harbiylarning dastlabki guruhlari Qorabog‘ga 10-noyabrning o‘zida yetib borgan.

Rossiya prezidenti qurolli kuchlardan mamlakat tashqarisida foydalanishi uchun Federatsiya Kengashidan ruxsat olishi kerak. Xususan, 2014-yilning 1-martida senatorlar Vladimir Putinga Rossiya qo‘shinlarini Ukraina hududiga kiritishga ruxsat bergan edi.

Avvaliga Kreml Federatsiya Kengashining 2015-yil sentabrdagi qarori amalda bo‘lgani uchun prezidentga tinchlikparvarlarni Qorabog‘ga kiritish uchun qo‘shimcha ruxsat kerakmasligini aytgandi. Federatsiya Kengashining Konstitutsiyaviy qonunchilik va davlat qurilishi qo‘mitasi rahbari Andrey Klishasning ma’lum qilishicha, Rossiya prezidenti Qorabog‘ga harbiylarni kiritish bo‘yicha senatorlardan baribir ruxsat olishga qaror qilgan, chunki tinchlikparvarlar missiyasi uzoq davom etadigan xarakterga ega.

Bahsli hududga 2 mingga yaqin Rossiya tinchlikparvarlari kiritiladi, ular o‘t ochishni to‘xtatish rejimiga rioya qilinishini nazorat qiladi. Shuningdek, tomonlar asirlar, marhumlarning jasadlarini ayirboshlashni boshlaydi va mintaqada transport qatnovini qayta tiklaydi.