2020-yilda suratga olingan turk seriallaridagi eng mashhur juftliklar bo‘yicha reyting tuzildi. Bu haqda Akşam nashri xabar bergan.

Ma’lum qilinishicha, ro‘yxat tomoshabinlarning interfaol so‘rovnomalardagi ishtiroki va ijtimoiy tarmoqdagi postlar soniga asoslangan holda tuzilgan.

Unga ko‘ra “Yaxshi va yomon kunda” serialidagi Elchin Sangu va Ozan Dolunay ijro qilgan Leyla va Sharp qahramonlari birinchi o‘rinni egallagan. Juftlik haqida ijtimoiy tarmoq foydalanuvchilari tomonidan 1,9 million post qoldirilgan. Reytingda past ko‘rsatkich qayd qilgani uchun 6-qismdan to‘xtatib qo‘yilgan serial bilan bog‘liq bunday natija tanqidchilarni hayratda qoldirgan.

Ikkinchi o‘ringa esa “Eshigimni qoq” serialida Xande Erchel va Kerem Bursin gavdalantirgan Eda va Serkan juftligi munosib topilgan. Faqatgina turk muxlislari ishtirok etgan so‘rovnomada, juftlik haqida 1,6 million post yozib qoldirilgan.

O‘zbek muxlislariga “Sevgi iztirobi” serialidagi roli bilan yaxshi tanish bo‘lgan Neslixan Atagulning “Elchining qizi” serialida Engin Akyurek bilan birgalikda ijro qilgan Nare va Sanjar juftligi esa 500 ming post bilan uchinchilikni egallagan.

To‘rtinchi o‘ringa “Beqaror” serialida Akin Akino‘zu va Ebru Shahin ijrosidagi Miran va Reyyan loyiq deb topilgan.

Turkiyaning eng kelishgan aktyorlaridan biri Jan Yamanning efirdan olib tashlangan “Janob xato” serialidagi O‘zge Gurel bilan birga ijro qilgan Ezgi va O‘zgur qahramonlari esa beshinchi bo‘lgan.