Toshkent shahridagi davlat budjeti mablag‘lari hisobidan moliyalashtiriladigan loyihalar buyurtmachisi, Toshkent shahri hokimligining “Yagona buyurtmachi xizmati” injiniring kompaniyasi shahardagi yirik qurilish obyektlarini tajribasiz xususiy qurilish kompaniyalariga tendersiz topshirayotgani ma’lum bo‘ldi. Bu haqda Telegram’dagi “Davletovuz” kanali xabar bergan.
Telegram kanal muallifi ochiq manbalarga tayanib ushbu kompaniya tomonidan Toshkentda turli inshootlarni qurish, infratuzilma va kommunal tarmoqlar, yo‘l, kommunal tarmoqlar barpo etish, ta’mirlash kabi buyurtmalar to‘g‘ridan to‘g‘ri, asosan hukumat hujjatlari bilan xususiy kompaniyalarga taqdim etilgani haqida yozgan.
Postga ilova qilib keltirilgan jadvalda davlat xaridlari portalida joylashtirilgan, shartnoma qiymati qariyb 1,5 trillion so‘mlik buyurtmalar qaysi kompaniyalarga berilgani haqida ma’lumot taqdim etilgan.
Xususan, Power Construction Planet MChJ (avvalgi nomi Discovery Invest) kompaniyasi (kompaniyaning 66,9 foiz ulushiga muqaddam Akfa Engineering Managment kompaniyasida direktor o‘rinbosari va direktor lavozimlarida ishlagan Ismoil Isroilov egalik qiladi) bilan Arxitektura institutining uchta binosini qurish uchun jami 167 milliard so‘mlik, Davlat soliq qo‘mitasi binosini kapital ta’mirlash va jihozlash uchun 35,6 milliard so‘mlik, Favqulodda vaziyatlar vazirligi Mirzo Ulug‘bek tumani bo‘limi binosini qurish va jihozlash uchun 17,9 milliard so‘mlik, Raqamli Toshkent situatsion markazini qurish uchun 100,2 milliard so‘mlik, Zangiota tumanida ixtisoslashtirilgan 2160 o‘rinli karantin zonasini qurish uchun 39,2 milliard so‘mlik shartnomalar tuzilgan.
2020-yilning mayiga qadar Ismoil Isroilov 40 foizlik ulushiga egalik qilgan, hozirda 82,40 foiz ulushi Nodirjon Asatovga tegishli bo‘lgan ECO HOUSE-GROUP MChJ (avvalgi nomi Whitecity Construction) bilan Mirzo Ulug‘bek tumanidagi Geologiya fanlari universiteti bino va inshootlarini qurish hamda ta’mirlash uchun 357,6 milliard so‘mlik, Sergeli tumani O‘zar ko‘chasida qurilayotgan 46 ta ko‘p kvartirali uylarning ichki muhandislik tarmoqlarini qurish va hududlarni obodonlashtirish uchun 22,7 milliard so‘mlik, Talabalar shaharchasida OTM o‘qituvchi, ilmiy xodimlari uchun 6 ta ko‘p qavatli uylarning ichki muhandislik tarmoqlarini qurish va hududni obodonlashtirish uchun 6,4 milliard so‘mlik shartnomalar imzolangan.
Summalar asosan shartnoma qiymatiga taalluqli bo‘lib, yakuniy miqdori bajarilgan ishlar bo‘yicha ko‘p yoki kam bo‘lishi ham mumkin.
“Ayrim shartnomalarda manfaatlar to‘qnashuvi ehtimoli ham ko‘rinadi, buyog‘i endi mutasaddi idoralarning ishi. Aksariyat kompaniyalar so‘nggi 2-3 yilda tashkil topgan. Shunday bo‘lsa-da, yirik-yirik obyektlar ularga tendersiz ishonib topshirilgan. Mablag‘lar asosan respublika budjeti, shaharning rejadan oshgan qismidan jalb qilinishi belgilangan”, – deyilgan Telegram kanalda e’lon qilingan postda.
Avval Toshkent hokimligi qarzlar bozoriga kirib, 500 million dollarlik yevroobligatsiyalarni joylashtirishni rejalashtirayotgani haqida xabar berilgandi.
Izoh (0)