Namangandagi avtomobillarga gaz to‘ldirish shoxobchalarida vaqtinchalik cheklovlar joriy etilgani ma’lum qilindi
Namangan viloyatidagi avtomobillarga gaz to‘ldirish shoxobchalarida cheklovlar joriy etildi. Bu haqda viloyat hokimining o‘rinbosari Saidahmad Sultonov jurnalistlar bilan o‘tkazilgan matbuot anjumanida ma’lum qildi, deya xabar beradi “Daryo” muxbiri Azizbek Abduvaliyev.
“Vodiyda eng oxiri biz shunday cheklovlarni joriy qildik. Energetika vazirligi tomonidan kiritilgan tizim bo‘yicha aholi va ijtimoiy soha obyektlariga kuz-qish mavsumida tabiiy gaz yetkazib berishni uzluksiz ta’minlash maqsadida shunday qilindi. To‘g‘ri, avtotransportning deyarli 90 foizi gazga o‘tib bo‘ldi, turnaqator navbatlar yuzaga kelyapti, lekin kunlar sovib ketganligi uchun birinchi galda aholi ehtiyojini hisobga olishga majburmiz”, — dedi viloyat hokimining o‘rinbosari.
Sultonovga ko‘ra, cheklovlar 8-noyabrdan kuchga kirgan va avtomobillarga gaz to‘ldirish shoxobchalariga har kuni soat 18:00 dan tonggi soat 6:00 gacha gaz yetkazib berish vaqtincha to‘xtatiladi.
Jurnalistlarning bu cheklovlar ortidan yo‘lkira narxlari oshib ketishi borasidagi xavotirlariga javoban jamoat transportida narxlar ko‘tarilmasligi, turli uyushmalarga kiruvchi yo‘lovchi tashish bilan shug‘ullanuvchi korxonalarda ham narx-navo nazoratga olinishi ma’lum qilindi.
