O‘zbekiston Prezidenti “Surxondaryo viloyati va Toshkent shahrida maxsus iqtisodiy va kichik sanoat zonalari faoliyatini yanada rivojlantirish chora-tadbirlari to‘g‘risida”gi farmonni imzoladi, deb xabar beradi “Gazeta.uz”.
Hujjatga ko‘ra, Termiz erkin iqtisodiy zonasi hududini qisqartirish hisobiga tegishli infrazilma obyektlari bilan ta’minlangan Termiz xalqaro savdo markazi erkin savdo zonasi hamda “Termiz xalqaro savdo markazi erkin savdo zonasi direksiyasi” davlat unitar korxonasi tashkil etiladi.
Termiz xalqaro savdo markazi hududida:
- Zamonaviy texnologiyalar asosida mahsulotlarni qabul qilish, saqlash, qayta ishlash, saralash va qadoqlash xizmatlari hamda elektron savdo portallari tashkil etiladi;
- “yagona darcha” va interaktiv mexanizmlar asosida bojxona, soliq, sertifikatsiya, fitosanitariya, veterinariya, transport, bank va valyuta ayriboshlash, mobil aloqa hamda mijozlar uchun tibbiyot va mehmonxona, avtotransport vositalariga texnik xizmat ko‘rsatish va boshqa xizmatlar yo‘lga qo‘yiladi;
- Afg‘oniston fuqarolari va ushbu davlat hududidan kiruvchi boshqa davlat fuqarolari va fuqaroligi bo‘lmagan shaxslarning, istisno tariqasida, O‘zbekistonga kirish vizasini rasmiylashtirmasdan, shaxsiy va pasport nazoratidan o‘tgan holda (vaqtinchalik ro‘yxatdan o‘tmasdan) o‘n kun davomida hududga kirish, hududda bo‘lish va undan chiqish tartibi joriy etiladi;
- Faoliyat yuritayotgan tadbirkolar tomonidan chet el fuqarolariga va fuqaroligi bo‘lmagan shaxslarga realizatsiya qilinadigan hamda Afg‘oniston hududiga olib chiqiladigan tovarlar va xizmatlar eksportga tenglashtiriladi;
- Chet el tovlari “erkin bojxona zonasi” bojxona rejimiga rasmiylashtirish orqali joylashtiriladi hamda istisno tariqasida, ushbu tovarlar bilan chakana savdo operatsiyalarini amalga oshirishga ruxsat etiladi;
- O‘zbekisotn hududida bo‘lgan xorijiy davlat fuqarolari va fuqaroligi bo‘lmagan shaxslar harakatlanish hujjatlari asosida alohida nazorat o‘tkazish punkti orqali o‘tadi va ortga qaytishda faqat kirgan nazorat o‘tkazish punkti orqali ruxsat etiladi.
Farmonda ta’kidlanishicha, sanoat kooperatsiyasini chuqurlashtirish, yangi ish o‘rinlarini yaratish maqsadida Toshkent shahrining Sergeli tumanida Sergeli industrial parki kichik sanoat zonasi tashkil etilgan.
Vazirlar Mahkamasiga zaxira jamg‘armasi mablag‘lari hisobidan o‘n kun muddatda ustav fonlarini shakllantirish uchun Termiz xalqaro savdo markazi va Sergeli industrial parki direksiyalariga 5 milliard so‘mdan mablag‘lar ajratish topshirilgan.
Bundan tashqari, O‘zbekiston Tiklanish va taraqqiyot jamg‘armasi kredit mablag‘lari Surxondaryo viloyati va Toshkent shahar hokimliklariga 3 yil muddatga, shu jumladan, 1 yillik imtiyozli davrni hisobga olgan holda, yillik foiz stavkasi 6 oylik LIBOR +2 foizda obyektlar qurilish-montaj ishlarini bajarish hamda zarur infratuzilmalarni barpo etishga Ma’muriy kengashlar tomonidan tasdiqlangadigan mazilli ro‘yxatlarga asosan ajratiladi.
Surxondaryo viloyati hokimligiga Termiz xalqaro savdo markazi obyektlari qurilishiga 20 million dollar, Toshkent shahar hokimligiga esa Sergeli industrial parki obyektlari qurilishiga 40 million dollar kredit ajratiladi.
Eslatib o‘tamiz, shu yilning avgustida Prezidentning Xorazm viloyatida tadbirkorlikni rivojlantirish va uning investitsiyaviy jozibadorligini oshirish chora-tadbirlari to‘g‘risidagi 17-avgustdagi qarori bilan Hazorasp erkin iqtisodiy zonasi (EIZ) qishloq xo‘jaligida foydalanilmayotgan bo‘sh turgan yer uchastkalari hisobidan kengaytirilishi belgilangan edi.
Izoh (0)