Peruning vaqtinchalik prezidenti Manuel Merino de Lama iste’fo berdi. Bu haqda u xalqqa murojaat qilib so‘zlagan nutqida ma’lum qildi, deb yozadi “RBK”. Shundan keyin ko‘p o‘tmay, mamlakat parlamenti raisi Luis Valdes parlament prezidiumi raislarining iste’fosi haqida e’lon qildi.
Merino de Lama mamlakat prezidenti vazifasini vaqtinchalik bajaruvchi lavozimiga olti kun avval — 10-noyabr kuni kirishgan edi. U pora olishda ayblanayotgan Martin Viskarra o‘rnini egallagandi.
Merino de Lamani lavozimidan chetlatish talabi Peruda 9-noyabr kuni boshlangan norozilik namoyishlarida ikki kishi halok bo‘lishi bilan bog‘liq. 14-noyabr kuni Limada milliy politsiya bilan to‘qnashuvlar chog‘ida ikki yosh yigit vafot etgan.
Shundan keyin Peru vazirlar mahkamasining 13 a’zosi Merino de Lama bilan ishlashdan bosh tortdi va ishdan ketishini ma’lum qildi. Ular orasida sog‘liqni saqlash, qishloq xo‘jaligi, adliya, iqtisodiyot, madaniyat, savdo va turizm, ta’lim, energetika, mudofaa hamda ichki ishlar vazirlari bor.
Merinoning iste’fosidan bir daqiqa avvalroq parlament raisi Luis Valdes parlament partiyalarining barchasi prezident iste’fosi zarurligiga rozi bo‘lganligini e’lon qildi. Respublika kongressi aks holda Manuel Merinoga qarshi impichment jarayonini boshlash bilan tahdid qildi. Mamlakatning yangi rahbariyati haqida qaror qabul qilish uchun parlament shoshilinch videokonferensiya o‘tkazishni rejalashtirmoqda.
Perudagi siyosiy inqiroz sentabrda boshlandi. O‘shanda davlat rahbari Viskarraga tegishli audioyozuv e’lon qilingandi. Unda prezident qo‘shiqchi Richard Sving bilan uchrashganini tan olgan. Viskarra Madaniyat vazirligi bilan shartnoma tufayli qo‘shiqchiga nisbatan sud ishi yuzasidan tekshiruvlarga to‘sqinlik qilishda ayblangandi. Viskarra mamlakat hududlaridan birini boshqarayotgan vaqtida yirik miqdorda pora olganlikda gumon qilindi.
Dastlab kongress (Peruning bir palatali parlamenti) Viskarraga nisbatan impichmentni yoqlab ovoz bergan edi, ammo besh kundan keyin o‘z qarorini o‘zgartirdi. O‘shanda deputat Fransisko Sagasti buni mamlakat koronavirus pandemiyasi sharoitlarida yashayotgan bir paytda hozir impichmentning vaqti emasligi bilan izohlagan edi. Oxir-oqibat, Viskarra 10-noyabr kuni lavozimidan olindi. Shundan keyin Peruda uning tarafdorlari ko‘chalarga chiqdi.
Eslatib o‘tamiz, Viskarraning iste’fosini 105 nafar parlament a’zosi qo‘llab-quvvatlagan, 19 nafari qarshi chiqqan, to‘rt kishi betaraf qolgan edi. Konstitutsiyaga muvofiq, davlat rahbari o‘rnini parlament spikeri Merino de Lama egallab turgan, 10-noyabr kuni u qasamyod qabul qilgandi. El Peruano gazetasining yozishicha, Viskarrani lavozimidan chetlatish qarori uning “ma’naviy nochorligi” tufayli qabul qilingan.
Izoh (0)