Prezident Shavkat Mirziyoyev Qashqadaryo viloyati ma’muriy markazi Qarshi shahrida sutka davomida faqat to‘rt-besh soat suv berilishini tanqid ostiga oldi. Davlat rahbari bu haqda 13-noyabr kuni Qarshi shahrida bo‘lib o‘tgan faollar yig‘ilishida to‘xtalib o‘tgan, deya xabar bermoqda “Daryo” manbasi.
Yig‘ilishda ta’kidlanishicha, aholining ichimlik suvi ta’minoti Qashqadaryo bo‘yicha 50 foizni, xususan, Kosonda 26, Dehqonobodda 4, G‘uzorda esa 2,4 foizni tashkil qiladi, quvurlarning 60 foizi ta’mirtalab bo‘lib qolgan. Qarshi shahrida, shuningdek, kanalizatsiya tizimi ham eskirgan.
“Viloyat markazi Qarshi shahrida 24 soat davomida bor-yo‘g‘i to‘rt-besh soat suv beriladi. Qayerda bor bunday holat? Qoraqalpog‘istonda ham yo‘q bunday vaziyat. Qarshida ichimlik suvi quvurlarining 60 foizi ta’mirtalab bo‘lib qolgan”, — degan Shavkat Mirziyoyev.Prezident yig‘ilishda Qashqadaryoda markazlashgan ichimlik suvi bilan ta’minlanish darajasini 79 foizga, xususan, bu borada vaziyat og‘ir bo‘lgan G‘uzor tumanida 50 foizga yetkazish vazifasini qo‘ygan.
Eslatib o‘tamiz, avvalroq, 2020-yil oktabrida Qarshi shahri bir hafta ichimlik suvisiz qolib ketgani haqida xabar berilgan edi. Bu haqda OAVda xabarlar chiqqach shahardagi ichimlik suvi ta’minoti qisqa muddat ichida qayta tiklangan edi.
Izoh (0)