O‘zbekistonda 2020-yilning yanvar–sentabr oylarida ishsizlik darajasi 11,1 foizni tashkil etib, 2020-yilning birinchi yarim yilligiga nisbatan 2,1 foizga kamaydi, deya xabar bermoqda Bandlik va mehnat munosabatlari vazirligi.
Ta’kidlanishicha, 2020-yilning sentabr oyida Respublika aholi bandligi va mehnatni muhofaza qilish ilmiy markazi tomonidan respublikaning 108 ta shahar va tumanlarida navbatdagi ijtimoiy so‘rov o‘tkazildi. Tadqiqot davomida 490 ta o‘zini o‘zi boshqarish organlari, 4,9 mingta uy xo‘jaligi hamda 26,0 ming nafar fuqaro qamrab olindi.
Qayd etilishicha, 2020-yilning yanvar–sentabr oylarida mehnat resurslari soni 19,1 million kishini tashkil etib, 2019-yilning shu davriga nisbatan 0,7 foizga yoki 135,5 ming kishiga oshgan.
Iqtisodiyot tarmoqlarida band bo‘lganlar soni 13,2 million kishini tashkil etib, 2020-yilning birinchi yarim yilligiga nisbatan 3,7 foizga (468,5 ming kishiga) oshgan.
2020-yilning yanvar–sentabr oylarida rasmiy sektorda band aholi soni 5,6 million kishini tashkil qilib, 2020-yilning yanvar–iyun oylariga nisbatan 1,7 foizga yoki 92,6 ming kishiga oshdi.
Norasmiy sektorda band bo‘lganlar soni 5,6 million kishini tashkil etib, 2020-yilning yanvar–iyun oylariga nisbatan 9,9 foiz yoki 504,2 ming kishiga ortgan. Bu asosan respublikadan tashqariga ishlash uchun chiqadigan mehnat migrantlarining ichki mehnat bozoriga qaytib kelishi hamda mavsumiy ishlar qishloq xo‘jaligida band bo‘lganlarning ortishi evaziga yuzaga kelgani aytiladi.
Respublikadan tashqariga ishga ketganlar soni 1,9 million kishini tashkil etgan, bu 2020-yilning yanvar–iyun oylariga nisbatan 128,3 ming kishiga yoki 6,3 foizga kamaygan.
O‘tkazilgan tadqiqot natijalari ko‘ra, ishga muhtoj bo‘lganlarning umumiy soni 1,6 million kishini tashkil etdi. Ishsizlik darajasi iqtisodiy faol aholi orasida 11,1 foizni tashkil etganligini ko‘rsatdi. 16-30 yoshgacha bo‘lganlar o‘rtasida ishsizlik darajasi – 17,1 foiz, ayollar o‘rtasida ishsizlik darajasi esa – 14,7 foiz bo‘ldi.
Respublikada iqtisodiy nofaol aholi 2020-yil yanvar–sentabr oylarida 4,2 million kishini tashkil etib, 2020-yilning birinchi yarim yilligiga nisbatan 3 foizga yoki 130,3 ming kishiga kamaygan.
Shuningdek, 2020-yilning yanvar–sentabr oylarida Tuman (shahar) Aholi bandligiga ko‘maklashish markazlariga murojaat qilgan 910 201 nafar fuqaroga xizmat ko‘rsatilgan.
Murojaat qilgan fuqarolarning 243 946 nafari ish bilan ta’minlangan, 500 449 kishi jamoat ishlariga jalb qilingan, 25 384 nafar ishsizlar kasbga o‘qitilgan, 45 036 nafar fuqaroga ishsizlik nafaqasi tayinlangan, 38 002 kishiga mehnat munosabatlari bo‘yicha konsultatsiyalar berilgan.
Shuningdek, Bandlikka ko‘maklashish jamg‘armasidan ajratiladigan subsidiyalar hisobiga 30 827 nafar oila shaxsiy tomorqalarda, 19 174 nafar fuqaro qishloq xo‘jaligi, tikuvchilik va hunarmandchilik kooperativlarida band qilindi, 7 383 nafar fuqaro tadbirkorlikka jalb etilgan.
Mavzuga doir:
Izoh (0)