Amerikaliklar koronavirusga qarshi AQShda yaratilgan vaksinadan keyingi yilning aprelidan boshlab foydalanishi mumkin bo‘ladi. Bu haqda prezident Donald Trampga tayanib, Reuters xabar berdi. AQSh oziq-ovqat va dori-darmon vositalari sifati masalalari bo‘yicha boshqarmasi (FDA) tez orada mamlakatda yaratilayotgan vaksinalardan birini tasdiqlashi mumkin.

Foto: AP Photo

Trampning ta’kidlashicha, vaksina tayyor bo‘lishi bilan u Nyu-Yorkdan boshqa barcha shtatlarga yetkazib beriladi, chunki gubernator Endryu Kuomo ushbu masalani keyinroqqa surishga qaror qilgan. “Buni siyosiy nuqtayi nazardan yaxshi deb o‘ylamayman, u vaksina bo‘yicha shoshilmoqchi emas”, — deydi prezident. Uning so‘zlariga ko‘ra, Kuomo ushbu masalada Tramp administratsiyasiga ishonmasligini shama qilgan. “Ruxsat bo‘lmagunicha, Nyu-Yorkka vaksinani yetkazib bermaymiz”, — deydi u.

Gubernatorning o‘zi keyinroq ushbu masalaga to‘xtalib, Trampning o‘zini nuqtayi nazari borasidagi so‘zlari haqiqatga mos kelmasligini aytgan. Kuomoning katta maslahatchisi Rich Azzopardi o‘zining Twitter’dagi sahifasiga u “COVID-19’dan eng ko‘p jabr chekkan jamiyat ko‘proq vaksina olishi uchun kurashayotgani”ni yozgan. Nyu-York bosh prokurori Letitsiya Jeyms esa o‘z navbatida vaksina shtatga yetkazib berilmasa, Trampning ustida sudga shikoyat qilishini aytgan.

Avvalroq sentabr oyining o‘rtalarida AQSh prezidenti koronavirusga qarshi vaksinaning mamlakat aholisi o‘rtasida keng tarqatish oktabr oyidan boshlanishini ma’lum qilgandi.

Eslatib o‘tamiz, AQShning Pfizer kompaniyasi tomonidan yaratilgan koronavirusga qarshi vaksina 90 foiz samaradorlik ko‘rsatgani haqida xabar berilgan edi. “Sputnik” vaksinasini ishlab chiqqan Rossiyaning Gamaleya nomidagi markaz rahbari Aleksandr Grinsburg Pfizer preparatining sinov natijalariga munosabat bildirib, “dunyoda qancha ko‘p vaksina bo‘lsa, odamlar shuncha yaxshi himoyalanadi”, deb aytgan.

Rossiya Sog‘liqni saqlash vazirligining terapiya va umumiy tibbiy amaliyot bo‘yicha bosh mutaxassisi Oksana Drapkina koronavirus infeksiyasiga qarshi yana bir samarali vaksina paydo bo‘lishini “xushxabar” deb atadi. U Rossiyaning “Sputnik V” preparati samaradorligi ham 90 foizdan yuqoriligini bildirgan.