Rossiya prezidenti ma’muriyati AQSh Demokratik partiyasidan prezidentlikka nomzod Jo Baydenning vakillari bilan aloqada bo‘lmagan. Bu haqda Rossiya prezidentining matbuot kotibi Dmitriy Peskov ma’lum qildi, deb xabar bermoqda “RBK”.
Kreml AQShdagi saylovdan keyin Baydenning jamoasi bilan aloqaga chiqqan-chiqmagani haqidagi savolga javoban Peskov: “Yo‘q, aloqa bo‘lmagan”, — dedi.
Prezident matbuot kotibi saylovlarning rasmiy natijalari e’lon qilingandan so‘ng Vladimir Putin AQShning yangi prezidentiga tabrik telegrammasini yuborishini aytdi.
“Agar biz to‘g‘ri tushungan bo‘lsak, saylangan prezident hali e’lon qilinmagan”, — deb qo‘shimcha qildi Peskov.
Avvalroq Xitoy Tashqi ishlar vazirligi vakili Van Venbin Jo Bayden va Kamala Xarrisni prezidentlik saylovidagi g‘alabasi bilan tabriklagan edi. “Biz Amerika xalqining tanlovini hurmat qilamiz va janob Bayden va Xarris xonimni tabriklaymiz”, — dedi u. Shuningdek, Turkiya prezidenti Rajab Toyyib Erdo‘g‘on va BMT bosh kotibi Antoniu Guterrish, Janubiy Koreya prezidenti Mun Chje In Jo Baydenni AQSh prezidentligi saylovidagi g‘alaba bilan tabriklagan edi. Dmitriy Peskov avvalroq ham Putin “saylov natijalari rasman e’lon qilinganidan keyin” Baydenni tabriklashini bildirgan.
AQShdagi prezidentlik saylovida berilgan ovozlarni hisoblash hali yakunlanmagan va g‘olib rasman e’lon qilinmagan.
OAV ma’lumotlariga ko‘ra, hozirgi paytda Bayden jamoaviy saylovchilarning 290 ta ovoziga egalik qilmoqda. Tramp esa 217 ta ovoz olgan. Yana 31 ta ovoz Shimoliy Karolina va Jorjiya shtatida o‘z egasini kutmoqda.
Izoh (0)