Samarqand shahrida turmush o‘rtog‘iga majburlab pampers yedirgan erkak ishi bo‘yicha sud boshlandi, deya xabar berdi “Daryo” muxbiri Farhod Norbo‘tayev.
Ma’lum bo‘lishicha, 1985-yilda Samarqand shahrida tug‘ilgan Sh.K.ning xotiniga nisbatan qilgan ishi 2020-yilning 12-noyabr kuni Samarqand shahar sudi sudyasi Zarifa Ahmedova raisligida ochiq sud majlisida ko‘rib chiqila boshlandi.
Sud avvalida ayblanuvchining advokati sudda ko‘rilayotgan ish oilaviy masala bo‘lganligi uchun ommaviy axborot vositalari va blogerlar sudda ishtirok etmasligini so‘ragan. Jabrlanuvchi Mustahkam Vahobova esa mazkur holat ijtimoiy tarmoqlarda keng yoritilganligi va muhokama qilinganligi uchun sudda OAV vakillari hamda blogerlar ishtirokiga qarshilik qilmasligini bildirdi. Uning turmush o‘rtog‘i Sh.K. esa advokatining gapini ma’qullab, sudda jurnalist va blogerlar ishtirok etmasligini so‘ragan.
Taraflarning fikrini tinglagan sudya jinoyat ishini ko‘rishda OAV va blogerlar ishtirokiga ruxsat bergan.
Sudda so‘z olgan ayblanuvchi Sh.K. o‘ziga qo‘yilgan ayblovning qasddan badanga o‘rtacha og‘ir shikast yetkazish (Jinoyat kodeksining 105-moddasi) qismini tan olib, 103-modda (o‘zini o‘zi o‘ldirish darajasiga yetkazish) va 110-modda (qiynash) nazarda tutilgan jinoyatlarni sodir etmaganligini bildirgan. Shuningdek, u ijtimoiy tarmoqlarda tarqalgan videodagi holat bo‘lganligini tan olgan.
Jabrlanuvchi M.Vahobova sudga bo‘lib o‘tgan holatlar bo‘yicha barcha asoslari borligini, turmush o‘rtog‘i tomonidan uzoq yillar davomida turli tazyiqlarga uchrab kelganligini bayon qilib, ayblanuvchiga qonuniy jazo berilishini so‘ragan.
Sud 2020-yil 18-noyabr kuniga qadar tanaffus e’lon qildi.
Eslatib o‘tamiz, avgust oyida ijtimoiy tarmoqlarda Samarqand shahrida eri tomonidan ayovsiz kaltaklanayotgani aks etgan ayol videosi tarqalib ketgan edi. Ma’lum bo‘lishicha, er ayolni muntazam xo‘rlagan va majburlab pampers yedirgan. Erkak turmush o‘rtog‘ini urgani tasvirlangan video internetda tarqalgach uyidan qochib ketgan. 23-avgust kuni erkak Toshkentda qo‘lga olinib, Samarqandga olib ketilgan. Keyinroq Senat mazkur ayol bilan bog‘liq vaziyatni o‘z nazoratiga olgandi.
Izoh (0)