Dunyoda COVID-19’ni yuqtirib olganlar soni 52 million kishidan oshdi

Pandemiya boshidan buyon dunyo bo‘yicha 52 milliondan ortiq odam koronavirusga chalindi, deb yozadi “RBK” Jons Hopkins universiteti ma’lumotlariga tayanib.

Kasallanganlar soni bor-yo‘g‘i bir kecha-kunduzda 1 millionga oshdi — 51 millionlik ko‘rsatkich haqida universitet 11-noyabr kuni e’lon qilgan edi. Oy boshidan buyon esa bemorlar soni 6 million kishiga ko‘paydi.

Barcha holatlarning yarmidan ko‘pi beshta mamlakat hissasiga to‘g‘ri keladi, bular:

• AQSh — 10,3 million kishi virusni yuqtirgan. Bir sutka ichida mamlakatda 145 ming kishida koronavirus aniqlandi — bu butun davr uchun rekord ko‘rsatkich;
• Hindiston — 8,6 million (+ bir sutkada kasallangan 44,2 ming kishi);
• Braziliya — 5,7 million (+10,9 ming);
• Fransiya — 1,9 million (+22,1 ming);
• Rossiya — 1,8 million. Mamlakatda ketma-ket besh kundan buyon kuniga 20 mingdan ortiq kasallanganlar aniqlandi, 11-noyabr kuni bu ko‘rsatkich 19,8 ming kishigacha kamaydi.

Dunyo bo‘yicha jami 1,28 million kishi koronavirusdan vafot etgan. Eng ko‘p qurbonlar AQShda (240,9 ming), Braziliyada (163,3 ming) va Hindistonda (127,5 ming).

Ma’lumot uchun, dunyoda koronavirusga chalinganlar soni 5-oktabr kuni 35 milliondan, 11-oktabr kuni 37 million, 14-oktabr kuni 38 million, 19-oktabr kuni 40 million, 22-oktabr kuni 41 million, 5-noyabr kuni 48 million, 9-noyabr kuni 50 million kishidan oshgandi.