Chiroqchida 300 yillik tarixga ega masjid soxta hujjatlar bilan yopildi. Aholi buni masjid imomiga nikoh o‘qitmay qo‘yganlik uchun jazo deb hisoblamoqda

Qashqadaryo viloyatining Chiroqchi tumanidagi 300 yillik tarixga ega Bobosher jome masjidi faoliyati soxta hujjatlar asosida tugatilib, guvohnomasi Kitob tumanida joylashgan Hazrati Bashir jome masjidiga berib yuborildi. Bu haqda “Daryo”ga xabar bergan chiroqchiliklarning ma’lum qilishicha, soxta hujjat masjidning sobiq imom xatibi Shuhrat Ravshanov tomonidan tayyorlangan va imzolar ham soxtalashtirilgan.

Mazkur muammoni o‘rganishni maqsad qilgan “Daryo” muxbiri Otabek Qo‘ldoshev Chiroqchi tumanining Oqto‘nli qishlog‘ida bo‘ldi.

“Masjidimizning yopilishiga sababchi bo‘lgan inson bu — Rahmatilla Usmonov. U insonni men hurmat qilardim. Birga haj safariga borib kelgandik. Ammo yolg‘on gapirib, biz namozxonlarni Allohning dargohi bo‘lmish masjiddan ayirdi. Masjidimiz guvohnomasi Kitob tumanidagi Hazrati Bashir ziyoratgohi masjidiga berib yuborildi. Rahmatilla Usmonov bu qing‘ir ishini bajarishda masjidimizning o‘sha paytdagi imomi Shuhrat Ravshanovdan foydalandi”, — deydi masjid namozxonlaridan biri Shodiyor hoji Ergashev.

“Daryo” muxbiri bilan suhbatlashgan oqto‘nliliklarning aytishicha, masjid faoliyati 2019-yil 1-noyabr kuni tugatilgan. Ammo aholi masjid faoliyati tugatilganidan 2020-yil 24-fevral kuni xabar topgan. Masjid yopilishining sababini bilish maqsadida Qashqadaryo viloyat Adliya boshqarmasiga borgan murojaatchilarga esa “masjid faoliyatini davom ettiryapti, hali yopilgani yo‘q”, degan javob berilgan.

“Masjidimizni soxta qaror bilan yopishgan, — deydi yana bir namozxonlardan biri Omondavlat Jumanov. — Masjidimizning o‘sha paytdagi imomi Shuhrat Ravshanov 2019-yil 27-iyul kuni masjid mas’ullari ishtirokida umumiy yig‘ilish o‘tkazildi, deb soxta qaror tayyorlagan. Masjid imomi o‘tkazilmagan yig‘ilishni o‘tkazildi deb, yig‘ilish bayonnomasini tayyorlagan va unda ‘MFY raisi so‘zga chiqib, Bobosher jome masjidiga ehtiyoj yo‘qligini, shu masjiddan 4,5 km uzoqlikda masjid borligini aytib, yopish kerak, dedi’ deya soxta qaror tayyorlagan. Eng yomoni soxta qarorda o‘zga shaxs nomidan imzo ham qo‘ygan”.

“Qumdaryo” MFY raisi Sherzod Abduxoliqovning tasdiqlashicha, u masjid mas’ullari tomonidan tashkil etilgan hech qanday yig‘ilishda ishtirok etmagan bo‘lsa-da, yig‘ilish bayonida uning so‘zga chiqqani, masjidga ehtiyoj yo‘qligini aytgani yozilgan.

“Men masjid yopilishiga bag‘ishlangan yig‘ilishda ishtirok etmaganman. Holbuki, yig‘ilishda ishtirok etmasam-da, mening nomimdan masjidga ehtiyoj yo‘qligi, masjiddan 4,5 km uzoqlikda Oqtosh diniy tashkiloti borligini aytganim yozilgan. Mazkur hujjat soxtalashtirilgan. Men deputat va MFY raisi sifatida bu soxta hujjat haqida Musulmonlar idorasining viloyatdagi mas’ullariga xabar berdim. Lekin haligacha ular bu so‘rovimga javob berishmagan”, — deydi MFY raisi Sherzod Abduxoliqov.

Aholi vakillari tomonidan soxta deb aytilayotgan hujjatda yig‘ilish kotibi deya ko‘rsatilgan Xolmirza Tojiyev ham hujjatdagi imzo unga tegishli emasligini aytmoqda.

“Masjidni yopish haqidagi yig‘ilish bayonida meni yig‘ilish kotibi sifatida kiritishib, nomimdan imzo ham qo‘yishgan. Aslida bu yig‘ilishda men umuman ishtirok etmaganman. Hech qanday hujjatga imzo ham qo‘ymaganman. Demakki, imzomni ham soxtalashtirishgan”, — deydi shu masjidda 12 yil mutavvali bo‘lib ishlagan Xolmirza Tojiyev.

“Daryo” muxbiri yig‘ilishda ishtirok etgani yozilgan yana bir mas’ul, Chiroqchi tuman imom xatibi Bekzod Norqulov bilan suhbatlashganda mas’ul ushbu yig‘ilishda ishtirok etmaganini, hujjatda tuman imom xatibi yig‘ilishda ishtirok etdi, degan gap yolg‘onligini ta’kidladi.

“Men Bobosher jome masjidini yopish haqidagi umumiy yig‘ilishda ishtirok etmaganman. Mening ishtirok etganim yozilgan hujjat soxta”, — deydi Musulmonlar idorasining tumandagi vakili Bekzod Norqulov.

Mazkur vaziyatga oydinlik kiritish maqsadida Bobosher jome masjidining sobiq imomi, ayni kunda boshqa hududdagi masjidga imomlik qilayotgan Shuhrat Ravshanov bilan bog‘landik va aholi tomonidan soxtaligi aytilayotgan hujjat haqida so‘radik. Jurnalist ekanligimizni bilgan Shuhrat Ravshanov savolimizni eshitgach birozdan so‘ng qayta qo‘ng‘iroq qilishini aytib, telefon go‘shagini qo‘ydi. Birozdan so‘ng esa uning telefoni batamom o‘chirilgani ma’lum bo‘ldi.

Oqto‘nliliklarning qo‘shimcha qilishicha, masjid yopilishiga bosh-qosh bo‘lgan Shuhrat Ravshanov unga nikoh o‘qitmay qo‘ygan aholini shu yo‘l bilan jazolagan.

“Shuhrat Ravshanov masjidimizga imom etib tayinlangach nikoh o‘qish narxini 200 ming so‘mgacha oshirdi. Shuningdek, aholi imomning ikki nikohli ekanligini eshitgach unga nikoh o‘qitmay qo‘ydi. Bu esa masjid imomi Shuhrat Ravshanovga ma’qul kelmadi. Va u aholining ishlab turgan masjidini yopish bilan ularni jazoladi”, — deydi oqto‘nliliklar.

Aytilishicha, aholi masjid yopildi degan gaplardan xabar topgach Musulmonlar idorasining viloyatdagi mas’uli Rahmatilla Usmonovning oldiga ham borgan. Din peshvosi ham “masjidingiz faoliyati tugatilmagan, namoz o‘qishda davom etavering”, degan javobni berish bilan kifoyalangan.

“Rahmatilla Usmonov hamda viloyat Adliya boshqarmasi mas’ullarining oldiga 50 marotabadan ko‘p bordik. Har safar borganimizda masjid faoliyati tugatilmagan, ishlashni davom ettiradi degan javobni berishardi. 2020-yil 3-oktabr kuni borganimizda esa masjid yopildi, qayerga borsangiz boring, degan javobni berishdi. Masjid yopilishiga sabab nima? Musulmonlar idorasining masjid yopilganligi to‘g‘risidagi hujjatini ko‘rsating desak, ko‘rsatishmadi”, — deydi Shodiyor hoji Ergashev.

“Daryo” muxbiri bilan suhbatlashgan Rahmatilla Usmonov esa Bobosher jome masjidi yopilmaganini, shunchaki hujjatlarida kamchilik borligini ma’lum qildi.

“Shaxsan o‘zim mening yonimga kelgan namozxonlarga masjid hujjatlarida kamchilik borligini aytib, to‘g‘rilashlarini so‘radim. Masjid yopilmagan. Faoliyatini davom ettiradi. Faqat hujjatlaridagi kamchilik tuzatilsa, bas”, — dedi Rahmatilla Usmonov.

Bobosher jome masjidi yopildimi yoki yo‘qmi degan savolimizga Qashqadaryo viloyat Adliya boshqarmasidan ham tayinli javob bo‘lmadi. Biroq bizga taqdim etilgan hujjatlarda esa masjid imom xatibining soxta qarori asosida boshqarmaning o‘sha paytdagi boshlig‘i Muzrop Ikromovning 2019-yil 1-noyabrdagi buyrug‘i bilan Bobosher jome masjidi qayta ro‘yxatdan o‘tkazilgan. Shunga ko‘ra, Bobosher jome masjidining nafaqat guvohnomasi, hisob raqami ham Hazrati Bashir ziyoratgohidagi masjidga berib yuborilgan.

Ushbu holat yuzasidan Adliya vazirligi va O‘zbekiston Musulmonlari idorasi o‘rganish o‘tkazib, munosabat bildirishi maqsadga muvofiq ko‘rinadi.