“Barselona” so‘nggi yillarda shu darajada katta muammolar girdobiga tushib qoldiki, hatto klubni o‘zidan-da yaxshi ko‘radigan afsona Messi ham uni tark etishni xohlab qoldi. Biroq ana shunday bir paytda jamoaning boshqa bir afsonasiga shunchaki chiqish eshiklari ko‘rsatildi. Ha, bu Luis Suares edi. Klub ochiqchasiga undan voz kechdi, qo‘ydi. Uning shuncha yillik mehnatlari qadrlanmadi...
Suaresning maydon va uning tashqarisidagi eng yaqin do‘sti Messi uning klubdan quvilganiga norozilik bildirar ekan, quyidagi so‘zlarni yozdi: “Ketganingni qabul qilishni boshladim, biroq bugun kiyinish xonasiga kirdim va o‘sha yerda bo‘layotgan voqealarni to‘liq his qildim. Kunni sensiz o‘tkazish naqadar qiyin bo‘lishini anglayapman, maydonda ham, uning tashqarisida ham. Seni juda sog‘inamiz. Necha yillik birgalikdagi tushlik va kechki ovqatlanishlar...
Seni boshqa klub libosida ko‘rish g‘alati bo‘ladi, senga qarshi o‘ynash esa undan ham g‘alati. Sen “Barselona” tarixidagi eng muhim o‘yinchilardan biri eding, sovrin va individual yutuqlaring tufayli munosib xayrlashishlariga loyiq eding. Klubdan bu kabi irg‘itib yuborishlariga loyiq emas eding. Biroq meni endi hech nima ajablantirmayapti. Yangi sarguzashtlaringda barcha yaxshi tilaklarni bildirib qolaman. Seni juda yaxshi ko‘raman. Yaqinda ko‘rishamiz, do‘stim”.
Luis esa o‘ziga yangi jamoa topishda va unga moslashishda muammolarga duch kelmadi. U Ispaniyaning boshqa bir klubi “Atletiko” safiga qo‘shilib, u yerda birdaniga “o‘ziniki” bo‘lib oldi va ketma-ket gollar ura boshladi. Mahalliy AS nashri Suaresni suhbatga tortib, undan Messi bilan hozirgi munosabati, Ronald Kuman va Xosep Bartomeu haqidagi fikrlarini so‘radi. “Daryo” quyida mazkur intervyuni o‘zbek tilida taqdim etadi.
Messi bilan hozirgi munosabatlari haqida
“Biz tez-tez gaplashib turamiz. Ammo biz ko‘proq hayot haqida gaplashmoqdamiz. Bugungi kunda sodir bo‘layotgan voqealar to‘g‘risida. Shu kunlarda o‘g‘illarimizning tug‘ilgan kuni bo‘ldi va biz bu narsalar haqida suhbatlashdik. Bizning munosabatlarimiz yaxshi va biz faqat futbol haqida emas, balki shaxsiy masalalarda ham bir-birimizga suyanishga harakat qilamiz”.
Messiga bo‘layotgan tanqidlar haqida
“U hozir 33 yoshda va u har qanday vaziyatga qanday bardosh berishni biladi. Men uni oldingidek tashna holda ko‘ryapman. U hamon futboldan zavqlanmoqda va taslim bo‘lgani yo‘q, muhimi shu. Chunki ba’zida to‘p darvozaga kirishni istamasa ham, harakat qilaverish kerak. Bu u haqida ko‘p narsani anglatadi”.
“Barsa” bilan shartnomasi tugaganidan keyin Leoning “Atletiko”ga o‘tishi mumkinligi haqida
“Messi o‘zi hal qilishi kerak bo‘lgan qarorlarni qabul qila oladi. Men hech qachon undan hech narsa so‘ramayman. Men uni har doim, qayerda bo‘lishidan qati nazar himoya qilaman. U o‘zi xohlagan qarorlarni qabul qilishdan xursand bo‘ladi”.
Ronald Kuman bilan munosabatlari haqida
“Kuman bilan munosabatlarim professional bo‘lgan. U bu haqida menga o‘z vaqtida ma’lum qildi (klubdan ketishi kerakligini telefon orqali aytgan) va men unga o‘zimga klub topgunimga qadar jamoada mashg‘ulotlarni davom ettirish huquqim borligini aytdim. Uch hafta davomida to‘liq professionallik bilan mashg‘ulot o‘tkazdim. Meni alohida mashg‘ulot o‘tkazishga yuborishdi va men bunga ham ko‘ndim, u mening ahvolimni bilgani uchun buni tushundi”.
Bartomeuning istefosi haqida:
“Haqiqat shuki, “Barselona”da sodir bo‘layotgan voqealar meni qiziqtirmayapti. Hozir “Atletiko”daman va shu klub sharafini himoya qilyapman. “Barsa”da bo‘layotgan voqealardan uzoqroq bo‘lishni afzal ko‘raman”.
“Barselona”ga urilgan golini nishonlash, nishonlamasligi haqida:
“Agar “Barsa”ga gol ursam, jamoadoshlarim va menga shuncha narsa bergan klubga bo‘lgan hurmatim tufayli uni nishonlamagan bo‘lardim. Shubhasiz, ko‘plab do‘stlarim bilan uchrashish bu alohida voqea bo‘ladi, ammo “Atletiko” sharafini o‘lgunimcha himoya qilaman”.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)