Yevropada transfer oynasi allaqachon yopilib bo‘lgan, biroq erkin agent maqomidagi futbolchilar hamon o‘zi uchun yangi klub izlash bilan ovora. Ajablanarlisi, ularning orasida dunyo tanigan nomdor futbolchilar ham bor. Ular ma’lum sabablarga ko‘ra transfer oynasi vaqtida o‘zlariga yangi jamoa topa olmay qoldi. Quyida aynan bir necha yil oldin o‘z klublarida yetakchi bo‘lgan, hozir esa hech kimga kerak bo‘lmay qolgan futbolchilar haqida fikr yuritiladi.
Daniel Starrij (31 yosh, so‘nggi klubi “Trabzonspor”)
Starrij Brendan Rojers qo‘l ostida Luis Suares bilan ajoyib tandem hosil qilgandi. Ammo Yurgen Klopp angliyalik futbolchining xizmatlaridan voz kechdi. Bundan tashqari, germaniyalik mutaxassis futbolchining tez-tez jarohat olishidan ko‘ngli to‘lmasdi. Shu tariqa Starrij 2019-yilning yozida erkin agentga aylanib, Turkiyaning “Trabzonspor”i bilan uch yillik shartnoma imzoladi. Ammo 2020-yilning mart oyida Starijning akasi futbolchining transferi yuzasidan garov o‘ynagani uchun u to‘rt oyga futboldan chetlatildi. Shu tufayli u 16 ta o‘yin o‘tkazib, 4 ta gol urgan turk klubi bilan shartnomasini bekor qilishga majbur bo‘ldi. Avgust oyida Starrij Sky Sports’ga bergan intervyusida Premyer Ligaga qaytmoqchi ekanini aytgandi. Biroq Premyer Liga klublari uning qaytishini xohlamayapti. Muammo ham shunda aslida.
Jek Uilsher (28 yosh, so‘nggi klubi “Vest Hem”)
Uilsher Angliyaning eng iqtidorli yarim himoyachilaridan biri hisoblanib, muntazam ravishda Arsen Vengerning “Arsenal”ida asosiy tarkibdan joy olardi. Jek ketma-ket ikki marta (2014 va 2015-yillarda) Angliya Kubogini qo‘lga kiritgan London jamoasining asosiy bo‘lagi edi. Biroq futbolning qora tomoni bo‘lgan jarohatlar ko‘plab iqtidorlar singari, Uilsherning faoliyatini ham barbod qildi. 2018-yilda “kanonirlar” safini tark etganidan so‘ng u “Vest Hem” safiga borib qo‘shildi. Ammo Uilsher u yerda ikki mavsumda barcha turnirlarda atigi 19 uchrashuv o‘tkazib, 1 tadan gol va golli uzatmaga mualliflik qildi.
Oktabr oyining boshida “Vest Hem” Uilsher bilan shartnomani bekor qilishga qaror qildi. The Times ma’lumotlariga ko‘ra, Jek u yerda haftasiga 100 ming funt olgan. 28 yoshli futbolchi hozirda o‘zini sog‘lom, kuchli va o‘ynashga tayyor ekanligini aytib, yangi klub izlash bilan shug‘ullanmoqda.
Denni Uelbek (29 yosh, so‘nggi klubi “Uotford”)
“To‘pchilar” safida jiddiy jarohatlardan azob chekkan yana bir futbolchi Uelbek edi. 2018-yilda jiddiy jarohat olgan Denni ikki marotaba operatsiya qilindi. 2018/2019-yilgi mavsum oxirida u erkin agent sifatida “Uotford” bilan shartnoma imzoladi. Yangi klubi safida u barcha musobaqalarda 20 ta o‘yin o‘tkazib, 3 ta gol urdi. Biroq odatda hujumchilardan yuqoriroq samaradorlik kutiladi. Buning ustiga jamoa ham mavsum yakunlariga ko‘ra, Premyer Ligani tark etdi. Shu bois ikkala tomonning roziligi bilan 2020-yilning oktabr oyida shartnoma bekor qilindi.
Samir Nasri (33 yosh, so‘nggi klubi “Anderlext”)
Fransiyalik futbolchi “Manchester Siti” bilan ikki bor Angliya chempioniga aylangandi. Biroq 2017-yilda Manchesterni tark etganidan keyin hamon biron joyda qo‘nim topishga qiynalmoqda. “Antalyaspor”da (Turkiya) u atigi 8 ta o‘yin o‘tkazib, 2018-yilning fevral oyida antidoping qoidasini buzgani uchun olti oylik diskvalifikatsiyaga uchradi. Apellyatsiya shikoyatidan so‘ng esa muddat yana bir yilga uzaytirildi. Shu tariqa Nasri 2019-yilning yanvaridagina “Vest Hem” bilan shartnoma imzolab, futbolga qaytdi. Ammo u yerda ham u barcha turnirlarda atigi oltita uchrashuvda qatnashib, ikkita golli uzatmani amalga oshirdi.
2019-yilning yozida Samir “Anderlext”dagi faoliyati bilan karyerasini tiklamoqchi bo‘ldi. Biroq Belgiyada u faqat koronavirus pandemiyasi paytida klub qoidalarini buzgani bilangina yodda qoldi, xolos. 33 yoshli fransuz klubga xabar bermasdan, Dubayga sayohatiga yo‘l olgan. Futbolchining o‘zi hech qayerga uchmaganligini ta’kidlagan. Nima bo‘lganda ham endi bularni muhokama qilishdan ma’no yo‘q. Boisi tomonlar allaqachon hamkorlikni to‘xtatgan. Ortda qolgan yozdan boshlab, Nasri yana erkin agentga aylandi, ammo hech bir klub uni hamon o‘z safiga chorlanicha yo‘q.
Mario Manjukich (34 yosh, so‘nggi klubi “Al-Duhail”)
2018/2019-yilgi mavsum oxirida “Yuventus”dan ketgan Manjukich Qatarning “Al- Duhail” klubiga o‘tdi. Ammo u yerda faqat 10 ta o‘yin o‘tkazib, atigi 2 ta gol urdi. Iyul oyi o‘rtalarida esa xorvatiyalik hujumchi Qatar klubi bilan shartnomasini bekor qildi. Aynan o‘sha pallada “Lokomotiv Moskva” futbolchining vakillari bilan muzokaralar olib borishni boshlagandi. Mario “temiryo‘lchilar” safiga qo‘shilishga juda yaqin edi, ammo so‘nggi daqiqalarda yevroning yuqori kursi tufayli bitim amalga oshmay qoldi. Bundan tashqari, “Milan” va A Seriyaning yangi vakili “Benevento” ham unga qiziqish bildirgandi. Biroq Manjukich hamon ishsiz.
Aleshandre Pato (31 yosh, so‘nggi klubi “San-Paulu”)
Braziliyalik futbolchining “Milan” safida porlaganini ko‘pchilik yaxshi eslasa kerak, biroq Pato aynan cho‘qqidaligida, kutilmaganda vataniga “Korintians”ga qaytishga qaror qildi. 2016-yilda u yana Yevropaga qaytdi: “Chelsi” va “Vilyarreal”da o‘ynab keta olmadi. Shundan so‘ng Xitoyning “Tyanszin Tyanxay” klubiga o‘tdi, chin yurtida u 60 uchrashuv o‘tkazib, 36 ta gol urishga muvaffaq bo‘ldi. 2019-yilning mart oyida esa Pato “San-Paulu”ga qaytdi, Braziliya klubi tarkibida u 35 ta o‘yin o‘tkazib, 9 ta gol urdi. Aprel oyi boshida 31 yoshli futbolchi o‘zini yana Yevropada sinab ko‘rmoqchi ekanini aytdi. Shu tariqa avgustda “San-Paulu”ni tark etgan Pato hanuzgacha yangi klub topgani yo‘q.
Shinji Kagava (31 yosh, so‘nggi klubi “Saragosa”)
Yaponiyalik futbolchi Yurgen Klopp boshqaruvidagi “Borussiya D”ning asosiy figuralaridan biri edi. 2019-yilda “arilar” safini tark etgan Kagava kutilmaganda Segunda vakili “Saragosa” bilan ikki yillik shartnoma imzoladi. Shinji ispan klubida 36 o‘yinda maydonga tushdi. Biroq klub La Liga yo‘llanmasini qo‘lga kirita olmadi. “Saragosa” turnir jadvalida 3-o‘rinni egalladi, o‘tish o‘yinida esa ikki o‘yin natijasiga ko‘ra, “Elche”ga imkoniyatni boy berib qo‘ydi. Oktabr oyi boshida Kagava klub muxlislari bilan xayrlashib, Ispaniya klubini tark etishga qaror qildi. Hozirda esa Kagava sabrsizlik bilan qishki transferlar oynasini kutmoqda.
Izoh (0)