“Barselona”ni qishki transferlar vaqtida tark etadigan 5 nafar futbolchi nomi ma’lum qilindi

Kataloniyaning “Barselona” klubi qishki transferlar vaqtida bir yo‘la 5 nafar futbolchisi bilan xayrlashadi, deya yozmoqda Mundo Deportivo.

Ta’kidlanishicha, jamoa bosh murabbiyi Ronald Kumanning rejalaridan quyidagi futbolchilar o‘rin olmagan: Usmon Dembele, Samyuel Umtiti, Martin Breytueyt, Xunior Firpo hamda Karles Alenya.

Katalon klubi mazkur futbolchilarni sotib, ulardan tushgan mablag‘ning ma’lum qismini “Lion”dan Memfis Depay hamda “Manchester Siti”dan Erik Garsiyani olib kelishga yo‘naltirishni rejalashtirgan.

Qayd etish joiz, “Barselona” Depay va Garsiyani yozgi transferlar oynasi vaqtida sotib olishga harakat qilgan, biroq yakunda ikkala futbolchi ham o‘z jamoasida qolgandi.

So‘nggi ma’lumotarga ko‘ra, Dembelening xizmatlariga “Manchester Yunayted” hamda “Yuventus”dan qiziqish bor. Breytueyt va Firpo esa La Liganing boshqa klublariga yo‘l olishi mumkin. Umtitiga esa sobiq klubi “Lion” xaridor bo‘lib turibdi.