“O‘zkimyosanoat” aksiyadorlik jamiyati tomonidan Qashqadaryo viloyatining Dehqonobod tumanida joylashgan “Tepaqo‘ton” kaliy tuzlari koniga press-tur tashkil etildi. Bu haqda “Daryo” muxbiri Musulmonbek Ibrohimov xabar berdi.
Jurnalistlar 320 metr chuqurlikdan “Tepaqo‘ton” kaliyli tuzlar tog‘-kon majmuasi ruda qazib chiqarish bilan tanishdi. Undan so‘ng mahsulot ishlab chiqarish va qadoqlash jarayoni ko‘zdan kechirildi.
Ma’lumot uchun, “Dehqonobod kaliy zavodi” AJning tog‘-kon majmuasi qurilishi 2008-yilda “Tepaqo‘ton” kaliy tuzlari konini ochish va tayyorlash ishlaridan boshlangan va dastlab kon ishlarini olib borish uchun №1 va №2 qiya stvollar ochilib, ruda qazib chiqarish ishlari amalga oshirish uchun panellar tayyorlangan.
“Tepaqo‘ton” konida panelli qazib olish tizimi yo‘lga qo‘yilgan bo‘lib, 2010-yil aprel—
may oylaridan silvinit rudasini qazib chiqarish amalga oshirib kelinmoqda. Korxonaning ishga tushishi bilan mamlakatimiz kimyo sanoatida yangi turdagi kaliy xlorid mineral o‘g‘iti to‘liq mahalliylashtirildi.
Bugungi kunga kelib korxona faoliyat boshlaganidan buyon eksport qilingan mahsulotning umumiy miqdori 1,6 million tonnaga yetgan. O‘zbekistonda ishlab chiqarilgan kaliy xlorid mineral o‘g‘iti Xitoy, Qozog‘iston, Tojikiston, Eron, Iroq, Birlashgan Arab Amirliklari, Vyetnam, Singapur, Malayziya, Shri-Lanka, Ozarbayjon, Gruziya, Armaniston, Turkiya, Moldaviya, Ukraina va Afrika davlatlariga eksport qilinmoqda.
Jamiyatning ishga tushirilishi bilan O‘zbekiston jahonda kaliy o‘g‘iti ishlab chiqaruvchi o‘n oltinchi, Mustaqil Davlatlar Hamdo‘stligida esa uchinchi mamlakat hisoblanadi. Ayni paytda barcha turdagi mineral o‘g‘itlar, ya’ni azot, fosfor, kaliyli o‘g‘itlar ishlab chiqarilmoqda.
Shuningdek, tadbir doirasida “O‘zkimyosanoat” AJ boshqaruv raisi korxonada faoliyat yuritayotgan yoshlar bilan uchrashdi. Jamiyat tizimida faoliyat yuritayotgan xodimlarning 9 ming nafaridan ortig‘ini yoshlar tashkil etadi.
Izoh (0)