Andijon hamda Xorazm viloyatlarida huquq-tartibot idoralari xodimlari tomonidan katta miqdordagi ko‘mir mahsulotlarining talon-toroj qilinishining oldi olindi. Bu haqda “Daryo”ning huquqni muhofaza qiluvchi organlardagi manbasi xabar qilgan.
Xabarga ko‘ra Bosh prokuratura huzuridagi departament hamda DXXning Shahrixon tumani bo‘limlari tomonidan IIB xodimlari bilan hamkorlikda o‘tkazilgan tezkor tadbirda HOWO yuk mashinasi haydovchisi Z. hech qanday hujjatsiz ko‘mir mahsulotlarini olib ketayotganligi aniqlangan.
Ushbu holat bo‘yicha o‘tkazilgan tekshiruvda “O‘zbekko‘mir” AJning “Andijon ko‘mir yetkazuvchi” filiali Shahrixon tumani ombori mansabdor shaxslari aholiga yetkazilishi lozim bo‘lgan arzonlashtirilgan 24,3 tonna ko‘mirni 12,1 million so‘mga sotib yuborgani fosh etilgan.
Shuningdek, Bosh prokuratura huzuridagi departamentning Xorazm viloyat boshqarmasi tomonidan o‘tkazilgan tezkor tadbirda “Ko‘mir ta’minot” MChJ Xorazm viloyati filialiga qarashli Yangiariq tuman ko‘mir ombori mudiri R.A. va operatori D.J. aholiga yetkazilishi lozim bo‘lgan arzonlashtirilgan 38,9 tonna ko‘mirni 13,6 million so‘mga viloyatdagi pishgan g‘isht ishlab chiqaruvchi korxonaga sotgan vaqtida ashyoviy dalil bilan ushlangan.
Mazkur holatlar bo‘yicha Jinoyat kodeksining 167-moddasi 2-qismi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari olib borilmoqda.
Mavzuga doir:
- Angrenda 25 yoshli yigit yuk poyezdiga ortilgan ko‘mirdan qariyb 1 tonna o‘g‘irlagani aniqlandi
- O‘zbekistonda gaz qazib olish hajmining pasayishi fonida budjet tashkilotlarining ko‘mirga bo‘lgan talabi oshdi
- Shahrisabzda ko‘mir ombori mudiri 30 mln so‘mlik ko‘mir mahsulotlarini talon-toroj qilgani aniqlandi
Izoh (0)