Eronning O‘zbekistonga yangi tayinlangan elchisi Hamid Nayrobodiy ikki mamlakat fuqarolari uchun vizalarni bekor qilish taklifi bilan chiqdi, deb xabar beradi “Dunyo” agentligi.
“Boj to‘lovlarini kamaytirish va bojxona to‘siqlarini olib tashlash tomon harakat qilish kerak. Shuningdek, transport loyihalarini amalga oshirishni tezlashtirish, ikki mamlakat o‘rtasidagi aviaqatnovlar sonini ko‘paytirish savdo-iqtisodiy hamkorlikni yanada jadallashtirishga xizmat qiladi”, — deyiladi xabarda.
Hamid Nayrobodiyning qayd etishicha, Eron va O‘zbekiston turizm bo‘yicha dunyoda yetakchi davlatlar qatorida turadi. Tarixiy va nodir meros sayyohlarni muntazam jalb etish uchun qulay imkoniyat taqdim etgan.
“Bu borada ikki mamlakat fuqarolari uchun vizalarni bekor qilish eng to‘g‘ri yo‘l deb o‘ylayman. Men shuning tarafdoriman. Bundan tashqari, turli biznes-tadbirlar, jumladan, videokonferensiya shaklidagi muloqotlar tashkillashtirish orqali tadbirkorlarni yanada yaqinlashtirishimiz mumkin. Texnik muhandislik xizmatlari, tibbiyot va yangi texnologiyalar sohalaridagi hamkorlikni kengaytirish ikki davlat o‘rtasidagi munosabatlarning har tomonlama rivojlanishiga yordam beradi. Men o‘z missiyam davomida ana shu rejalarni hayotga to‘liq tatbiq eta olsam, bundan xursand bo‘lardim. Bu yo‘lda yeng shimarib ishga kirishganmiz”, — deydi Eron elchisi.
Eslatib o‘tamiz, 16-oktabr kuni “Ko‘ksaroy” qarorgohida Prezident Shavkat Mirziyoyev Eronning O‘zbekistonga yangi tayinlangan elchisidan ishonch yorliqlarini qabul qilib olgandi. Eronning bundan oldingi elchisi Bahman Do‘rmoniy O‘zbekistondagi diplomatik faoliyatini 2019-yilda yakunlagan.
Izoh (0)