Germaniyaning CureVac NV biofarmatsevtik kompaniyasi koronavirusga qarshi vaksina sinovlarining ikkinchi bosqichi muvaffaqiyatli o‘tgani va yil oxirigacha yakuniy bosqich tugashini e’lon qildi.
“Biz asosiy 2b/3 (2- va 3-bosqich) sinovlarni 2020-yil oxirigacha amalga oshirishga tayyormiz”, – deyilgan kompaniya press-relizida.
Avvalroq CureVac’ning 2b/3 global klinik sinovlarni 2020-yil to‘rtinchi choragida 30 ming nafar ko‘ngilli ishtirokida amalga oshirishni rejalashtirgani ma’lum qilingandi.
Sinovlarning birinchi bosqichi Germaniya va Belgiyadagi sog‘lom odamlar (ko‘ngillilar) ishtirokida o‘tkazilgan. Ayni vaqtda CVnCoV vaksinasi Peru va Panamada 2a sinovlaridan o‘tmoqda. Tadqiqot birinchi bosqichi 18 dan 60 yoshgacha bo‘lgan 250 nafar sog‘lom odamlarni qamrab olgan va ularning natijalari katta umidlar bermoqda, degan Tyubingen tropik tibbiyot instituti direktori, professor Peter Kremsner.
Kompaniya axborotida qayd etilishicha, vaksinaning reaktogenligi ma’lumotlar monitoring va xavfsizlik komissiyasi tomonidan doimiy nazorat qilingan. Vaksina sinovlarida barcha dozalarda yaxshi qabul qilingan, jiddiy nojo‘ya ta’sirlar kuzatilmagan.
Eslatib o‘tamiz, Rossiyaning “Vektor” virusologiya va biotexnologiya davlat ilmiy markazi mamlakatdagi koronavirusga qarshi ikkinchi vaksinani ishlab chiqarishni boshlagan. “EpiVakKorona” Rossiyaning koronavirusga qarshi ikkinchi vaksinasi bo‘lib, ushbu vaksina uchun sentabr oyi oxirlarida patent olingan. Vaksina mushak ostiga jo‘natiladigan suspenziya shaklida ishlab chiqariladi.
Avvalroq Rossiyada patentlangan va ro‘yxatga olingan COVID-19’ga qarshi birinchi vaksina yaratilgan Gamaleya ilmiy markazi direktori Aleksandr Ginsburg koronavirusga qarshi vaksina qabul qilinganidan keyin paydo bo‘ladigan antitanalar keksa, spirtli ichimlik ichuvchi, ruhiy bosimga tushgan va yallig‘lanishga qarshi dori qabul qiladigan kishilarda yaxshi shakllanmasligini ma’lum qilgandi.
Shuningdek, Britaniyalik ekspertlar koronavirusga qarshi dastlabki vaksinalarga ishonchsizlik bildirgandi. Bill Geyts koronavirusga qarshi dastlabki vaksinalar samaradorligi ideal bo‘lmasligi mumkinligini aytgandi.
Izoh (0)