Bollivud qiroli 55 yoshda. Sayyoradagi eng baland minora — Burj Xalifada Shohruh Xonga atalgan tabrik paydo bo‘ldi (video)

Bollivud qiroli, taniqli aktyor Shohruh Xon 2-noyabr kuni 55 yoshni qarshi oldi. Shu munosabat bilan ko‘plab hind aktyor va rejissorlari aktyorni Instagram’dagi sahifasi orqali tabrikladi. Shohruh Xonning dubaylik muxlislari unga o‘ziga xos tabrik yo‘lladi. Shahardagi Burj Xalifa osmono‘par binosida aktyorga atalgan tabriknoma paydo bo‘ldi. U barcha muxlislariga murojaat qilib, bunday syurpriz uchun minnatdorchilik bildirdi. Shuningdek, Shohruh Xon o‘zini ijtimoiy tarmoqlar orqali tabriklayotganlarga ham tashakkurini bildirdi.

Shohruh Xonning ismi Burj Xalifada paydo bo‘lganida aktyorning o‘zi ham Dubayda bo‘lgan. Uning ushbu shaharda ham uyi bo‘lib, u “Jannat” deb ataladi.

Ma’lumot uchun, Burj Xalifa — Birlashgan Arab Amirliklarining Dubay shahrida qurilgan. Bino dunyodagi eng baland qo‘lda qurilgan inshoot degan nomni olgan. Burj Xalifaning balandligi (antennani hisobga olganda 828 metr) 624 metr, ya’ni 163 qavatdan iborat. Uning qurilishi 2004-yil 21-sentabr kuni boshlangan, 2010-yil 4-yanvarda rasman ochilish marosimi bo‘lib o‘tgan.