O‘zbekistonda Labo elektromobili ishlab chiqarish ko‘zda tutilmoqda. Uning taxminiy narxi ma’lum qilindi

O‘zbekistonda Labo avtomobili bazasida elektromobil yaratish loyihasi amalga oshirilmoqda. Bu haqda O‘zavtosanoat qoshidagi R&D markazi muhandisi Fikret Umerovga tayanib, “Kun.uz” ma’lum qildi.

Muhandisning aytishicha, Labo’ning elektromodeli ishlab chiqilgach uning sarf-xarajatlari keskin kamayadi. Loyiha qiymati 780 million so‘mni tashkil etadi.

“Bizning markaz tomonidan UzAuto Motors talablariga muvofiq ravishda milliy elektromobilni yaratish, avtomobillarni elektrlashtirish mo‘ljal qilib olingan.

Buning uchun birinchi bo‘lib Labo avtomobilini tanladik. Sababi, bu avtomobil konstruktiv nuqtayi nazardan yengilroq va viloyatlarda keng ishlatilayotgan, ekspluatatsiya qilinayotgan avtomobil hisoblanadi.

Ushbu avtomobil tannarxini tushirish uchun uning konstruksiya qismlarini maksimal darajada saqlab qolish harakatidamiz. Bu jarayonda mashinaning ichki yonuv dvigateli va uzatmalar qutisi olib tashlanadi, o‘rniga elektr dvigatel, reduktor va kontrollyor o‘rnatiladi. Kinematik sxema va uni boshqaradigan elastik boshqaruv dasturini ishlab chiqyapmiz. Shuningdek, boshqaruv matematik modelini yaratyapmiz.

Labo elektromobilining boshlang‘ich tannarxi 10 ming AQSh dollari atrofida bo‘ladi. Lekin bu mahalliylashtirilmagan holatida shunday. Qimmat, deyish mumkin. To‘g‘ri, chunki detallar import qilinadi. Uni keyinchalik mahalliy ishlab chiqarishga qo‘yish uchun birinchi navbatda iqlim sharoitida sinovdan o‘tkaziladi.

Bu bo‘yicha O‘zbekiston standarti yaratilmagan. Buni ham o‘zimiz yaratishimiz kerak. Negaki, bizning iqlim Yevropanikidan keskin farq qiladi”, – dedi Fikret Umerov.

Muhandisning so‘zlariga ko‘ra, avtomobilning bir quvvatlanishi minimal 150 kilometr, maksimal 250 kilometrgacha masofaga yetishi ko‘zda tutilgan. Quvvatlash 220 voltli tokdan bo‘lsa, 4 soatdan 8 soatgacha, quvvatlash stansiyasida esa maksimal 1 soat ketadi.

Labo elektromobilini yarim yil ichida yaratish ko‘zda tutilgan.

Avvalroq Toshkentda elektromobillar uchun dastlabki “zapravka”larni 2021-yilda qurish rejalashtirilayotgani xabar qilingandi.