Navoiyda ikki nafar aka-uka is gazidan zaharlanish oqibatida vafot etdi. Bu haqda Bosh prokuratura matbuot kotibi Hayot Shamsutdinov xabar berdi.
Ma’lumotlarga ko‘ra, 30-oktabr kuni Navbahor tumani “Paxtakor” mahallasida yashagan ikki nafar voyaga yetmagan aka-uka (2004-yilda tug‘ilgan, kollej talabalari) uyining yotoqxonasiga o‘rnatilgan gaz pechidan sizib chiqqan is gazidan zaharlanib vafot etgan.
Mazkur holat yuzasidan tuman prokuraturasi tomonidan tergovga qadar tekshiruv harakatlari o‘tkazilmoqda.
“Bunday ko‘ngilsiz hodisalarning oldini olish maqsadida gaz uskunalaridan va isitish moslamalaridan foydalanishda yong‘in va xavfsizlik talablariga qat’iy rioya qilishingizni so‘raymiz”, — deyiladi xabarda.
Avvalroq Samarqandda qo‘lbola pechdan is gazi sizib chiqishi oqibatida yosh er-xotin vafot etgani xabar qilingandi. Keyinroq ular ikki kun avval turmush qurgani ma’lum bo‘lgandi.
Izoh (0)