Fransiyaning Lion shahridagi grek cherkovi yaqinida otishma yuz berdi. Unda pravoslav ruhoniysi yaralandi

Fransiyaning Lion shahrida yuz bergan otishmada bir kishi jarohat oldi, deb xabar berdi mahalliy Le Progres nashriga tayanib Meduza.

Guvohlarning aytishicha, Lionning yettinchi tumanida joylashgan grek pravoslav cherkovi yonida ikki marta o‘q uzilgan. Hujum qilgan shaxs cherkov eshigini yopayotgan pravoslav ruhoniysini yaralagan, deb xabar bermoqda Reuters. Jinoyatchi miltiqdan o‘q uzgani ta’kidlangan.

AFP’ning yozishicha jabrlanuvchi og‘ir ahvolda kasalxonaga yotqizilgan. Ruhoniy jinoyatchini tanimasligini aytgan.

Politsiya o‘t ochgan jinoyatchini qidirmoqda. Shuningdek, aholi ushbu hududdan uzoq bo‘lishga chaqirilgan.

Eslatib o‘tamiz, 29-oktabr kuni Fransiyaning Nitssa shahridagi Notr-Dam ibodatxonasida qurollangan erkak odamlarga hujum qilib, uch kishini o‘ldirdi. Jinoyatchi 21 yoshli tunislik bo‘lib chiqdi. Fransiya hukumati Nitssadagi hujumni terakt deb baholadi, mamlakatda terroristik xavfning eng yuqori darajasi e’lon qilindi.

29-oktabrning o‘zida Fransiyaning Avinyon shahrida pichoq bilan qurollangan erkak “Allohu akbar” deb qichqirib, politsiyachilarga hujum qilishga uringan. Politsiyachilar o‘t ochgan va hujum qilgan erkakni o‘ldirgan. Deyarli bir vaqtda Saudiya Arabistonining Jidda shahrida Fransiya konsulligiga hujum uyushtirilgan, konsullik qo‘riqchisi jarohat olgan. Hujum qilgan erkak qo‘lga olingan. Bundan tashqari, Fransiyada Lion shahrida ham sodir bo‘lishi mumkin bo‘lgan yana bir tajovuzkor harakatning oldi olingan.

Shuningdek, 30-oktabrda Parij shahrida qurollangan erkak politsiyachilarga hujum qilishga uringani xabar qilindi.