USAID O‘zbekistondagi bog‘dorchilikka 23 mln dollar investitsiya jalb qilishga yordam berdi

O‘zbekistonda besh yarim yil ichida bog‘dorchilik sohasidagi xususiy sektorga USAID (AQSh Xalqaro taraqqiyot agentligi)ning qishloq xo‘jaligida qiymat zanjirlarini yaratish dasturining ko‘magi bilan 23 million dollar miqdorida investitsiya jalb qilindi. Bu haqda 27-oktabr kuni dastur yakuniga bag‘ishlangan virtual tadbirda ma’lum qilindi.

“Qo‘shimcha qiymatga ega bo‘lgan tijorat bog‘dorchiligini rivojlantirish bo‘yicha loyiha orqali o‘zbekistonlik tadbirkorlar yangi texnologiyalar va qishloq xo‘jaligi amaliyotlarini joriy etdi va strategik sarmoyalarni jalb qildi”, — degan AQShning Toshkentdagi elchisi Daniel Rozenblum.

Uning aytishicha, loyiha sheriklari orasida O‘zbekistondan meva-sabzavot eksporti 2015-yildan buyon 250 foizga o‘sdi va loyihada ishtirok etayotgan fermerlarning daromadi ikki barobardan ko‘proq oshdi.

Qishloq xo‘jaligi vaziri Jamshid Xo‘jayev ushbu loyiha qishloq xo‘jaligi mahsulotlarining hajmi va sifatini oshirish va uni qayta ishlashga, shuningdek, tadbirkorlik va ish bilan ta’minlash imkoniyatlarini kengaytirishga katta hissa qo‘shganini ta’kidladi.

Umuman olganda, dastur meva-sabzavot ishlab chiqaruvchilari, muzlatgichlar egalari, qayta ishlovchi va eksport qiluvchilarni o‘z ichiga olgan 510 tashkilotga yordam berdi. Mahalliy ishlab chiqaruvchilar yangi bozorlarga chiqish uchun xorijiy xaridorlar bilan aloqalarni o‘rnatdi.