Koronavirus ko‘payishi va tarqalishi uchun eng qulay joylardan biri og‘iz bo‘shlig‘i, shu jumladan, til, so‘lak bezlari va bodomsimon bezlar hisoblanadi. Bunday xulosaga AQSh va Buyuk Britaniya olimlari keldi, deb yozadi “RBK”.

Foto: AGN “Moskva”

“Og‘iz bo‘shlig‘i COVID-19 uchun ishonchli joy hisoblanadi va virusning so‘lak orqali yuqishiga imkoniyat yaratadi”, — deyiladi tadqiqot natijalarida.

Olimlar ma’lumotlariga ko‘ra, virus so‘lak bezlari bo‘shlig‘iga kirib olib, u yerda ko‘paya boshlaydi. Bundan tashqari, so‘lak yutib yuborilgach, koronavirus shu zahoti oshqozon-ichak yo‘liga tushadi.

Shu bilan birga, so‘lak yo‘talish, aksirish yoki gapirish paytida virusning boshqa odamlarga yuqishini ta’minlaydigan asosiy manba bo‘lib xizmat qiladi.

Avvalroq olimlar koronavirusning yangi turini aniqlagan va uni 20A.EU1 deb atagan edi. Virusning bu turi ayni paytda Yevropa mamlakatlarida keng tarqalmoqda. Olimlarning aniqlashicha, Yevropadagi pandemiyaning ikkinchi to‘lqini koronavirusning Ispaniya qishloq xo‘jaligi xodimlaridagi mutatsiyasi bilan bog‘liq bo‘lishi mumkin. Mutatsiyaga uchragan koronavirus 20A.EU1 nomini olgan, uning tarqalishidagi asosiy rolni esa Ispaniyada ta’til o‘tkazib qaytgan odamlar o‘ynagan.