Telegram’dagi “Exo Uzbekistana” kanalida UzAuto Motors kompaniyasi tomonidan ishlab chiqarilgan yangi yengil avtomobillarni olib ketayotgan avtovoz avariyaga uchragani tasvirlangan video paydo bo‘ldi.
Videodan ko‘rish mumkinki, Andijon viloyatiga tegishli davlat raqamiga ega avtovoz yo‘lda harakatlanish vaqtida boshqa bir yuk mashinasi bilan yo‘l-transport hodisasini sodir etgan. Avtovoz ustidagi Nexia va Cobalt avtomobillariga jiddiy zarar yetgan, ayrimlarining orqa bamperi osilib qolgan bo‘lsa, ba’zilarining yukxonasi pachoqlangan.
Avariya nima sababdan va kimning aybi bilan yuzaga kelgani to‘g‘risida ma’lumot berilmagan.
Eslatib o‘tamiz, UzAuto Motors va Monopoliyaga qarshi kurashish qo‘mitasi o‘rtasidagi avtomobil narxlari bilan bog‘liq sud jarayoni 2-oktabr kunidan buyon davom etmoqda. 9-oktabrda o‘tkazilgan sud majlisida UzAuto Motors tovarlar narxini shakllantirish maxfiy hujjatlarga asoslanganini bildirgan va sud 16-oktabrdagi majlisda ishni yopiq tartibda ko‘rishni boshlagan.
Izoh (0)