Farg‘onada 4 oy ichida 18 marta fotoradarga tushgan ayol haydovchi qariyb 13 mln so‘m jarima to‘ladi

Farg‘ona viloyatida 4 oy ichida 18 marotaba qoida buzgani qayd etilgan 32 yoshli ayol haydovchidan jarima undirildi, deya xabar bermoqda “Xabar.uz”.

Qayd etilishicha, 32 yashar G.M. (ayol) shaxsiy Nexia-3 avtomashinasida 4 oyda 18 marta fotoradarga tushgan. Birinchi marta 2020-yil 1-mart kuni Yozyovon tumanida harakatlanib ketayotgan vaqtida yo‘l harakati qoidasini buzgani qayd etilgan. 2020-yil 18-iyun kunigacha qoidabuzarliklar soni 18 taga yetgan. Fuqaro G.M.ning oxirgi qoidabuzarligi Toshkent viloyatining Ohangaron tumanida qayd etilgan.

Jami 18 ta qoidabuzarlik natijasida jarimalar miqdori 10 million 700 ming so‘mni tashkil qilgan. MIB xodimlari jarimalarni to‘lash uchun fuqaroga 15 kunlik ixtiyoriy muddat bergan. Berilgan muddat ichida jarimalar to‘lanmaganidan so‘ng Nexia-3 jarima maydonchasiga kiritilgan.

Avtomashina jarima maydonchasiga kiritilgan kuni G.M. barcha qoidabuzarligi uchun jarimalarni to‘lagan.

Ma’lumot uchun, Ma’muriy javobgarlik to‘g‘risidagi kodeksning 332-1-moddasida huquqbuzar tegishli qaror qo‘liga tegganidan o‘n besh kun ichida jarima miqdorining yetmish foizini ixtiyoriy ravishda to‘lasa, qolgan qismini to‘lashdan ozod etilishi belgilangan. Agar fuqaro G.M. qonunda belgilangan ushbu imtiyozdan foydalanganida, 2 million 510 ming so‘m miqdorida mablag‘ tejashi mumkin edi.

Biroq qoidabuzar ijro hujjatini o‘z vaqtida bajarish chorasini ko‘rmaganligi uchun unga nisbatan 2 million 230 ming so‘m ma’muriy jarima jazosi ham qo‘llanilgan.