O‘zbekiston Superligasining eng yosh futbolchisi aslida ikki yoshga katta ekani ma’lum bo‘ldi. Unga hozircha hech qanday jazo tayinlanmagan

Futbol bo‘yicha O‘zbekiston Superligasida harakat qiluvchi futbolchining yoshi kichraytirilganligi aniqlandi. Bu haqida Professional futbol ligasi rasmiy saytida xabar berildi.

Ta’kidlanishicha, tashkilot O‘zbekiston nomidan hali yirik xalqaro musobaqalarda ishtirok etib ulgurmagan, asosan, 2000-yildan keyin tug‘ilgan futbolchilarning yoshi bilan bog‘liq hujjatlarni o‘rganishni boshlagan. O‘rganishgalar uchun esa futbolda yoshni kichraytirishga qarshi kurashish asosiy sabab sifatida ko‘rsatilgan.

Qayd etilishicha, Superliga klubida to‘p tepuvchi futbolchining yoshi 2 yilga kichraytirilgan.

“Superliga klublarining birida to‘p suruvchi futbolchining tug‘ilganlik haqidagi dalolatnomasi va boshqa hujjatlari o‘rtasida tug‘ilgan yili bo‘yicha tafovut borligi aniqlandi. Ya’ni Davlat xizmatlari agentligi tomonidan taqdim etilgan ma’lumotnomaga muvofiq, uning tug‘ilganlik haqidagi dalolatnomasida tug‘ilgan yili 2002-yil etib ko‘rsatilgan, fuqarolik pasportida esa 2004-yil etib qayd qilingan”, — deyiladi PFL xabarida.

PFL bu borada futbol klubiga o‘yinchisining hujjatlarida chalkashlik borligi aniqlangani, shundan kelib chiqib topshirilgan hujjatlarni qayta o‘rganib chiqishni so‘rab ikki marta rasmiy xat yuborgan. Biroq futbol klubi tomonidan mazkur holat bartaraf etilmagan.

Tashkilot holatga aniqlik kiritilishi va qonunbuzilish holatiga vakolati doirasida huquqiy baho berishini so‘rab viloyat prokuraturasiga murojaat qilgan. Ma’lumotga asosan tuman prokuraturasi tomonidan tergovga qadar tekshiruv o‘tkazilgan hamda futbolchinining yoshini kichraytirish bilan bog‘liq hujjatlarni rasmiylashtirgan shaxslar aniqlangan.

Keyinroq tuman prokuraturasining talabi bilan tuman IIB migratsiya va fuqarolikni rasmiylashtirish bo‘limi tomonidan futbolchi nomiga yoshi kichraytirilgan holda rasmiylashtirilgan fuqarolik pasporti va xorijga chiqish biometrik pasporti amaldagi qonunchilikda belgilangan tartibda bekor qilinib, uning nomiga haqiqiy tug‘ilgan yili bo‘yicha fuqarolik pasporti rasmiylashtirib berilgan.

PFL 26-oktabr, dushanba kuni futbolchi to‘p suradigan klubga bu borada ma’lumot taqdim etgan hamda futbolchining hujjatlarini asl tug‘ilgan yili bilan qayta rasmiylashtirish talabini qo‘ygan.

“Biz futbolchining karyerasiga salbiy ta’sir ko‘rsatish fikridan yiroqmiz. Ammo uning faoliyatini yolg‘onlardan boshlashga urinish printsipiga qarshi kurashamiz. Barcha masala qonun doirasida to‘g‘ri hal etilsa, keyinchalik bundan O‘zbekiston milliy terma jamoasi ham manfaat ko‘radi, shuningdek, mana shunday holatlar kasriga qolib ketayotgan boshqa yosh futbolchilarda futbolga nisbatan qayta umid uyg‘onadi”, — deyiladi PFL xabarida.

PFL o‘z bayonotida yoshi kichraytirilgani isbotlangan futbolchining ism-sharifi va u qaysi futbol klubida to‘p surishini ochiqlamagan. Ayni vaqtda, Superliga klublarining 2020-yilgi mavsum uchun taqdim etgan o‘yinchilar ro‘yxatida faqat bir futbolchining 2004-yilda tug‘ilganligi ko‘rsatilgan — bu “Nasaf” futbolchisi Murod Xo‘jamberdiyevdir.

Murod Xo‘jamberdiyev 2020-yil 15-iyun kuni O‘zbekiston Superligasida debyut qilgan eng yosh (16 yosh) futbolchi sifatida e’tirof etilgan (u 14-iyun kuni Superliga 4-turi doirasida “Nasaf” tarkibida “Navbahor”ga qarshi maydonga tushgan, o‘yin tomonlarning 2:2 hisobidagi durang natijasi bilan tugagan), biroq oradan bir kun o‘tib OAVda “Superligada debyut qilgan eng yosh futbolchining yoshi kichraytirilgan bo‘lishi mumkin”ligi haqida xabarlar tarqalgan.

PFL bayonotida o‘rganish va tekshiruv ishlari aynan qachon olib borilgani, yoshi kichraytirilgani aytilayotgan futbolchi qachon yangi hujjatlarni olgani haqida aniq ma’lumot berilmagan. Qayd etish joiz, Murod Xo‘jamberdiyevning yoshi kichraytirilgan bo‘lishi mumkinligi haqidagi xabarlar iyun oyida tarqalganiga qaramay, u iyun oyida bitta, iyul oyida bitta, avgust oyida ikkita, sentabr oyida  bitta va oktabr oyida uchta o‘yinda “Nasaf” tarkibida maydonga tushgan. Shuningdek, u Temur Kapadze boshchiligidagi U-19 O‘zbekiston yoshlar termasiga ham jalb qilib kelinadi.

Ma’lumot uchun, o‘zbek futbolida yoshni kichraytirish holati tez-tez uchrab turadi. Jumladan, O‘zbekiston terma jamoasi va “Yuventus”, “Rejina”, “Verona”, “Peskara”, “Torino” klublaridagi faoliyati bilan ko‘pchilikka tanish Ilyos Zeytullayev intervyularidan birida o‘zining yoshi 2 yilga kichraytirilganini tan olgan.

Shuningdek, O‘zbekiston futbol federatsiyasi (hozir O‘FA) 2018-yil yanvarida yuqori divizion klublarida harakat qiluvchi 5 nafar futbolchi — Abdumutal Abdullayev (asl ismi Nodir Teshaboyev, 3 yoshga kichraytirilgan), Muhammadjon Abdullayev (asl ism-sharifi Rasuljon Abdullayev, 3 yoshga kichraytirilgan), Ulug‘bek Davlatov (asl ism-sharifi Nuriddin Hasanov, 2 yoshga kichraytirilgan), Zokir Ahmadaliyev (asl ism-sharifi Dilshod Ahmadaliyev, 2 yoshga kichraytirilgan), Burxon Hasanovlarni (2 yoshga kichraytirilgan) yoshi kichraytirilgani sabab umrbod futboldan chetlatgandi. Ammo oradan 5 oy o‘tib, 2018-yil 13-iyunida O‘FA ushbu futbolchilarni “o‘z aybini tushinib yetgan bu futbolchilarga yana bir bor imkoniyat berish maqsadida” kechirgani e’lon qilingan.

“Tashkilot klubga futbolchini asl hujjatlari bilan qaytadan ro‘yxatdan o‘tkazish talabini qo‘yadi. Uning vakolatlari shu bilan cheklanadi. Mazkur ishdan bosh tashkilot — O‘FA albatta xabardor qilinadi. O‘FA lozim topsa, ishni tegishli qo‘mitaga oshirishi, shuningdek, klubning bu ishga aloqador yoki yo‘qligini tekshirishi mumkin. Jazo tayinlash masalasi ham shundan kelib chiqadi.

Fikrimcha, bu yerda yosh futbolchiga jiddiy jazo berish unchalik ham to‘g‘ri emas. Boisi bizning maqsadimiz futbolda sog‘lom raqobatni vujudga keltirishga hissa qo‘shish hamda malakali futbolchilar sonini ko‘paytirish (ularni “chopish” emas). Katta ehtimol bilan futbolchining yoshi o‘zgartirilgan vaqtda uning o‘zi buning nima ekani haqida yetarlicha ma’lumotga ega bo‘lmagan, unga ota-onasi javobgar bo‘lgan.

Shundan kelib chiqib, futbolchining ota-onasini (aralashgan yoki yo‘qligiga qarab murabbiyini yoki klubini), shuningdek, hujjatni o‘zgartirishda ishtirok etgan boshqa shaxslarni javobgarlikka tortish to‘g‘riroq bo‘ladi. O‘z navbatida bu qolgan mana shunday kishilar uchun ham o‘rnak bo‘lishi mumkin”, — deya ushbu holatga izoh beradi O‘zPFL rahbari Diyor Imomxo‘jayev.

Eslatib o‘tamiz, avvalroq O‘zbekistondagi 13 yoshli abituriyentning yoshini kichraytirganlikda gumon qilingani hamda uning futbol bilan shug‘ullanishi xabar qilingandi. PFL esa ushbu holat bo‘yicha futbolchi tashkilot ro‘yxatidan o‘tmaganini, biroq haqiqatan futbol bilan shug‘ullanishini va o‘z tumanidagi bolalar-o‘smirlar sport maktabida ro‘yxatida turishini bildirgandi.