Butun dunyoda koronavirus bilan kasallanganlar soni 42 million kishidan oshdi. Bu haqda kasallik tarqalishini real vaqtda kuzatib kelayotgan Jons Hopkins universiteti ma’lumotlarida keltirilgan.
Ma’lumotlarga ko‘ra, kasallikka chalinish holatlari bo‘yicha AQSh yetakchilik qilmoqda — mamlakatda 8,47 million odamda COVID-19 tasdiqlangan. Hindiston 7,76 million ko‘rsatkich bilan 2-o‘rinda ketayotgan bo‘lsa, 3-o‘rinda Braziliya — 5,32 million kishida koronavirus aniqlangan. Undan keyingi pog‘onalardan Rossiya (1,48 million) va Fransiya (1,08 million) o‘rin olgan.
Shuningdek, universitet ma’lumotlariga ko‘ra, dunyoda koronavirus oqibatida vafot etganlar soni 1 143 399 kishiga yetgan bo‘lib, ularning 223,8 ming nafari AQSh hisobiga to‘g‘ri kelmoqda. Bundan tashqari, Braziliyada 155,9 ming bemor, Hindistonda — 117,3 ming, Meksikada — 87,4 ming, Buyuk Britaniyada esa — 44,6 ming bemor COVID-19 qurboniga aylangan.
Ma’lumot uchun, dunyoda koronavirusga chalinganlar soni 5-oktabr kuni 35 milliondan, 11-oktabr kuni 37 million, 14-oktabr kuni 38 million, 19-oktabr kuni 40 million, 22-oktabr kuni esa 41 million kishidan oshgandi.
Avvalroq JSST rahbari pandemiyaning juda qiyin oylari yaqinlashayotganidan ogohlantirgan edi.
Izoh (0)