“Lokomotiv” Jasur Jaloliddinov uchun “Bunyodkor”ga normadan kamroq kompensatsiya to‘laganmi?

O‘zbekistonlik futbolchi Jasur Jaloliddinovning “Bunyodkor”dan Moskvaning “Lokomotiv” klubiga transfer bo‘yicha hamon noaniqliklar borligi ma’lum bo‘lmoqda.  Avvalroq “Bunyodkor” Jasur Jaloliddinov transferidan tushgan mablag‘ni ishlata olmayotgani haqida xabar berilgandi. Bunga sabab qilib transfer ustida turgan tomonlarning asl transfer hujjatini topilmayotgani ta’kidlangandi.

“Daryo”ga ma’lum bo‘lishicha, moskvaliklar futbolchi transferi uchun toshkentliklarga mashg‘ulotlar kompensatsiyasi uchun normadan kamroq pul to‘lagan bo‘lishi mumkin. “Lokomotiv” klubi “Bunyodkor”ga Jaloliddinovning  mashg‘ulot kompensatsiyasi sifatida 130 ming yevro o‘tkazgan. Shuningdek, uchinchi tomon futbolchi uchun yana 200 ming AQSh dollari miqdorida pul tashlab bergan. Faqatgina “Bunyodkor” asl hujjatning yo‘qligi sabab bu mablag‘larni o‘z hisob raqamiga to‘liq o‘tkaza olmagan.

Shu yerda savol tug‘iladi: “Lokomotiv” aslida “Bunyodkor” futbolchisi uchun qancha kompensatsiya to‘lab berishi kerak edi? Mutaxassislar ma’lumotiga ko‘ra, kompensatsiya masalasida FIFA har bir konfederatsiya uchun, shuningdek, har bir davlat uchun alohida-alohida 4 xil ko‘rinishdagi summa belgilagan. UEFA davlatlari uchun 2019-yilgi holatga ko‘ra bu summalar mos ravishda 90 ming, 60 ming, 30 ming hamda 10 ming yevro etib belgilangan.

Rossiya klublari keyingi uch yo‘nalish bo‘yicha kompensatsiya to‘lashlari belgilab qo‘yilgan. Bunda Rossiya Premyer Liga klublari ikkinchi guruh bo‘yicha, ya’ni, yiliga 60 ming yevrodan haq to‘lashlari kerak. “Lokomotiv” Chempionlar Ligasida to‘p suradigan jamoa sifatida aynan ikkinchi yo‘nalishda summani hisoblashi mantiqan to‘g‘ri bo‘ladi.

Ammo “Bunyodkor”ga kompensatsiya to‘lashda uchinchi guruh summasi — 30 ming yevro inobatga olingan. Qoidaga ko‘ra, futbolchining 12–15 yoshdagi mashg‘ulotlari uchun 4-guruh bo‘yicha haq hisoblanadi, ya’ni, har yili uchun 10 ming yevrodan — umumiy 40 ming yevro. Shuningdek, 16, 17 va 18 yoshining har biri uchun 30 ming yevrodan umumiy 90 ming yevro hisoblangan. Jami — 130 ming yevro.

Agar “Lokomotiv” 2-guruh bo‘yicha haq to‘lashi kerak bo‘lsa, u holda 16, 17 va 18 yoshi uchun 60 ming yevrodan hisoblanishi kerak bo‘ladi. Shunda umumiy summa 130 ming emas, balki 220 ming yevroni tashkil qilgan bo‘lardi.

Ta’kidlash lozim, FIFA tizimiga “Lokomotiv” Jasur Jaloliddinov hamda “Bunyodkor” o‘rtasidagi shartnomaning bekor bo‘lgani haqidagi hujjatni joylashtirgan. Bunda na mashg‘ulot kompensatsiyasi summasi va transfer narxi ko‘rsatilgan. Kelib chiqadiki, futbolchi uchun 200 ming AQSh dollari uchinchi tomon tarafidan Jaloliddinov bilan shartnomani bekor qilish uchungina “Bunyodkor”ga to‘lab berilgan. Rossiya nashrlari esa Jaloliddinov uchun “Lokomotiv” 1 million yevrodan ko‘proq chiqim qilgani haqida ma’lumotlar berilgan.

Norasmiy manbaga ko‘ra, “Bunyodkor” klubi futbolchining mashg‘ulotlari uchun aslida qancha mablag‘ olishi kerakligi masalasida o‘z yuristlari bilan ishlayapti. Agar “Lokomotiv” chindan ham 2-guruh bo‘yicha pul to‘lashi kerak bo‘lsa, “Bunyodkor” bu borada FIFAga arz qilishi mumkin bo‘ladi. 200 ming dollarni esa asl hujjat topilganidagina qo‘lga kiritishi mumkin bo‘ladi.

Mavzuga doir: