Kaliforniyada Tesla Model 3 haydovchisi politsiya ta’qibidan qochishga urinib, boshqaruvni yo‘qotdi va katta tezlikda xususiy uylardan birining garajiga kelib urildi, deb xabar beradi Motor.

Foto: CBS Los Angeles

Ma’lum qilinishicha, erkak mashinani boshqarayotib, politsiyachilarning ko‘z o‘ngida xavf tug‘diradigan harakatni amalga oshirganidan so‘ng ta’qibga uchragan. Jarima to‘lashni istamagan haydovchi o‘zining elektrokarida huquq-tartibot xodimlaridan qochishga uringan.

Biroq u Tesla’ni boshqara olmay qolgan — qaysidir onda erkak avvaliga mashinaning orqa qismi bilan fonar simyog‘ochiga urilgan, keyin esa katta tezlikda yo‘l chetidagi uylardan birining garajiga “uchib kirib”, uni to‘liq yakson qilgan.

Haydovchi politsiyachilarni kutib o‘tirmasdan, avariya joyidan yashiringan. Politsiya xodimlari qochoqni “issiq izidan” topishga uringan, biroq qoidabuzar ertasi kunigina qo‘lga olingan. Haydovchi voqea joyidan qochayotganida mashina ichidagi yo‘lovchini tashlab ketgan. Yengil jarohat olgan yo‘lovchi shifoxonaga yetkazilgan.

Avvalroq Shimoliy Karolina shtatida avtopilotda harakatlanayotgan Tesla Model S ikkita politsiya avtomobili bilan to‘qnashuv sodir etgani, shuningdek, Tesla Model 3’ning ruli harakat vaqtida uzilib tushgani, Xitoyda Tesla avtopiloti soatiga 127 kilometr tezlikda harakatlanib, YTHga uchragani to‘g‘risida xabar berilgandi.