Eldor Shomurodovning Italiyadagi sarguzashtlarini boshlab beradigan “Verona” — “Jenoa” uchrashuvi haqida

Italiya A Seriyasining 4-turini 19-oktabr oqshomida bo‘lib o‘tadigan “Verona” — “Jenoa” uchrashuvi yakunlab beradi.

Mazkur bahs genuyaliklar uchun koronavirus bilan bog‘liq muammolardan keyingi ilk uchrashuv bo‘ladi. “Jenoa”da uch hafta avval COVID-19 bilan zararlangan ilk futbolchi aniqlangandi, shundan keyin jamoa “Napoli”ga qarshi kuchsizlangan tarkib bilan tushdi va 0:6 hisobidagi mag‘lubiyatni qabul qilib oldi, “Torino”ga qarshi o‘yin qoldirildi. 19-oktabr, oqshomida esa “Jenoa”ni oson bo‘lmagan raqib kutib turibdi. “Daryo” Eldor Shomurodov uchun Italiyadagi ilk qadam bo‘lishi kutilayotgan o‘yin haqidagi ma’lumotlarni taqdim etadi.

“Jenoa”ning o‘yin uslubi haqida

Genuya shahrining bosh jamoasi yozgi transferlar oynasida tarkibda yangilanishlar qildi. Eski hujumchilardan faqat Goran Pandev qoldi. Shuningdek, erkin agent maqomida Mattia Destro kelgan bo‘lsa, “Yuventus”dan Marko Pyatsa ijaraga olindi.

“Jenoa” 3-5-2 uslubida to‘p suradi: ikki hujumchi pressingda o‘ynaydi va raqib jarima maydoni atrofida faol harakat qiladi, qanot laterallari ularni uzatmalar bilan, markaziy yarim himoyachilar esa uzun paslar bilan  ta’minlaydi. Uchrashuvda qanot vakillari Shomurodovga sifatli uzatmalar amalga oshirib berishga harakat qiladi.

Biroq murabbiylar shtabi tarkibdagi yo‘qotishlar sabab uslubni 4-4-2 ga ham o‘zgartirishga majbur bo‘lishi mumkin. Sababi jamoaning ko‘plab yarim himoyachilari bu o‘yinda qatnasha olmaydi.

“Verona” haqida

2018/19-yilgi mavsumda B Seriyadan oliy divizionga qaytgan veronaliklar 2019/20-yilgi mavsumni 11-o‘rinda yakunlagandi.

Jamoa 2020/21-yilgi mavsumni ko‘tarinki ruhda boshladi. Jamoa birinchi turda “Roma”ni 3:0 hisobida dog‘da qoldirdi. Keyin esa “Udineze” taslim etildi. Biroq jamoa 3-turda “Parma”ga yengildi.

“Verona” asosan tajribali futbolchilarga tayanib harakat qiladi, jamoada 30 yoshdan oshgan o‘yinchilarning soni juda ko‘p. Ular orasidan Nikola Kalinichni alohida ajratib ko‘rsatish mumkin. Xorvatiyalik futbolchi yozda veronaliklar safiga kelib qo‘shilgandi.

Aytgancha, bir vaqtlar ushbu jamoada safida o‘zbekistonlik sobiq futbolchi Ilyos Zeytullayev harakat qilgan.

Eldor Shomurodov debyut qiladimi!?

Odatda yangi futbolchilar jamoaga biroz moslashib olgach maydonga tashlanadi, shunda ham debyutantlar ko‘pincha dastlabki o‘yinini zaxira o‘rindig‘ida boshlaydi. Biroq Eldor bilan buning aksi bo‘lishi katta ehtimol. Koronavirus sabab jamoada yuzaga kelgan kadrlar muammosi sabab Shomurodov bugungi o‘yinni asosiy tarkibda boshlashi ehtimoli juda yuqori. Genuyaliklar ustozi Rolando Maranning ta’kidlashicha, Eldor so‘nggi 5-6 kun ichida eng ko‘p shug‘ullangan o‘yinchi. Shuningdek, O‘zbekiston singari butun Italiya o‘zbek futbolchisining debyutini kutmoqda.

Shomurodov O‘zbekiston terma jamoasi safida Eronga qarshi o‘rtoqlik uchrashuvida (Eldor bu o‘yinda gol muallifiga aylandi) ishtirok etgach, terma jamoa bilan BAA yo‘l olmagan va Italiya qaytib ketgandi. Shunday ekan murabbiylar shtabi bu bahsda o‘zbekistonlik to‘purarga ishonch bildirishi turgan gap.

O‘zaro o‘yinlar

Mazkur jamoalar o‘zaro to‘qnash kelgan so‘nggi o‘nta o‘yinning oltitasida “Jenoa”ning qo‘li baland kelgan. Uchta bahsda “Verona” zafar quchgan bo‘lsa, yana bitta o‘yinda durang qayd etilgan. So‘nggi o‘yinlardan xulosa qiladigan bo‘lsak, bu to‘qnashuvda ko‘pincha g‘olib nomi ma’lum bo‘ladi. So‘nggi bor bu jamoalar 2014-yilda o‘zaro murosa yo‘lini tanlagan.

“Jenoa” va “Verona” o‘rtasidagi oxirgi o‘yin 2020-yilning fevralida bo‘lib o‘tgan va unda genuyaliklar 3:0 hisobidagi g‘alabani qo‘lga kiritgan edi. 2019/20-yilgi mavsumdagi dastlabki o‘yin esa “Verona” g‘alabasi bilan (2:1) tugagan.

Koronavirus bilan bog‘liq muammo

Biroz vaqt oldin “Jenoa” koronavirusning haqiqiy o‘chog‘iga aylandi. Genuyaliklar koronavirus sabab 3-tur doirasidagi “Torino”ga qarshi o‘yinni qoldirishga majbur bo‘ldi. Jamoaning 22 vakilida virus aniqlandi, ularning 17 nafari asosiy jamoa futbolchilari bo‘ldi. Biroq FIFA kunlaridagi tanaffus genuyaliklar joniga oro kirdi. So‘nggi test natijalari kasallanganlarning o‘n nafarida salbiy natija berdi. Shu tariqa “Jenoa” ustozi Rolando Maran bu o‘yinda Mattia Perin, Mixa Zays, Ivan Radovanovich, Marko Pyatsa, Luka Pellegrini, Davide Biraski, Filippo Melegoni, Valon Behrami, Lasse Shyone va Federiko Marketti xizmatlariga tayana oladi. Biroq xabarlarga ko‘ra “Verona”ga qarshi o‘yinda ulardan faqat Perin va Radovanovich asosiy tarkibdan joy olishi mumkin.

“Verona”da esa ikki o‘yinchi infeksiya sabab o‘yinni o‘tkazib yuboradi. Bular: himoyachi Koray Gyunter va hujumkor yarim himoyachi Antonin Barak.

Murabbiylar fikri

“Verona” kuchli jamoa, ular har qanday raqibga muammo tug‘diradi. Kimlar maydonga tushishi hozircha aniq ayta olmayman. So‘nggi mashg‘ulotdan keyin hammasini aniq bo‘ladi.

Shomurodov O‘zbekistondan qaytganidan keyingi 5-6 kun ichida hammadan ko‘p mashg‘ulotlarda qatnashdi. U Italiya futbolini o‘rganishga qattiq tirishmoqda va bunga xohishi yuqori. Bu jihatlar meni xursand qilmoqda. Biroq bu qadar qisqa muddat ichida moslashish juda qiyin.

Rolando Maran, “Jenoa” bosh murabbiyi

Maran o‘zining kuchli murabbiy ekanini ko‘rsata olgan. Albatta, hozir uning uchun qiyin palla, biroq bu jihatlar jamoaga yanda ko‘proq motivatsiya berishi mumkin. U juda tajribali murabbiy.

“Jenoa”da faqat kimlar maydonga tusha olmasligini bilamiz, xolos. Ularning ayrim futbolchilari xalqaro tanaffus vaqtida safga qaytgan. Shunday ekan, raqibni mensimaslik yaramaydi.

Ivan Yurich, “Verona” bosh murabbiyi

Taxminiy tarkiblar

Italiyaning mashhur nashrlari bahs uchun o‘z taxminiy tarkiblarini e’lon qildi. Ularning barchasi “Jenoa” hujum chizig‘iga Pandev va Shomurodov juftligini qo‘ygan.

Quyida La Gazzetta dello Sport nashri tomonidan ilgari surilgan variant bilan tanishing:

Uchrashuvni qanday tomosha qilish mumkin

“Verona” — “Jenoa” uchrashuvi “Futbol-TV” va Rossiyaning “Match-TV” telekanallari orqali jonli efirga uzatiladi.