O‘zbekiston OTMlarda an’anaviy ta’limga qaytish imkoniyati ko‘rib chiqiladi. Oliy va o‘rta maxsus ta’lim vazirligi matbuot xizmatining xabar berishicha, bu haqda 17-oktabr kuni bosh vazir o‘rinbosari Behzod Musayev rahbarligidagi ta’lim masalalariga bag‘ishlangan videoselektor yig‘ilishida aytilgan.

Foto: “Daryo”

Yig‘ilishda Oliy va o‘rta maxsus ta’lim vaziri o‘rinbosari Uzoqboy Begimqulov bugungi kunda OTMlarda masofaviy ta’limning olib borilishi monitoringi natijalari to‘g‘risida, mavjud muammolar va ularning yechimlari borasida vazirlik tomonidan ko‘rilayotgan choralar haqida ma’lumot berib o‘tgan.

Muhokamalarda oliy ta’lim muassasalarida an’anaviy ta’limga qaytish imkoniyatlari masalasi ham ko‘rib chiqilgan hamda OTM rektorlariga bu bo‘yicha qator vazifalar belgilab berilgan.

Jumladan, oliy ta’lim tizimida an’anaviy darslarga qaytishda, avvalo, talabalar va ularning ota-onalari o‘rtasida so‘rovnomalar o‘tkaziladi. Shuningdek, OTM tomonidan muassasa imkoniyatlari tahlil qilinadi, sanitariya-epidemiologiya talablari asosida o‘quv jarayonlarini tashkil etish, talabalar salomatligini xavf ostiga qo‘ymasdan talabalar turar joylari faoliyatini tiklash imkoniyatlari ko‘rib chiqiladi.

Bu borada yakuniy qaror oliy ta’lim muassasalari kengashi tomonidan talabalar, ularning ota-onalari takliflarini inobatga olgan holda sanitariya-epidemiologiya xizmati tegishli xulosasi asosida qabul qilinadi.

“So‘rovnomalar natijalariga ko‘ra hamda OTM imkoniyatlaridan kelib chiqqan holda respublikadagi oliy ta’lim muassasalarida an’anaviy ta’lim shakliga ruxsat etiladi”, — deyiladi xabarda.

Eslatib o‘tamiz, Respublika Oliy ta’lim kengashi raisi O‘ktam Umurzoqov “Yangi o‘quv yiliga tayyorgarlik masalasi ham juda murakkab bo‘lib turibdi. Mart oyidan buyon biz onlayn tizimda darslarni o‘tkazyapmiz, lekin xohlaymizmi, xohlamaymizmi, onlayn tizimi odatiy, yuzma-yuz dars o‘tish tizimining o‘rnini bosa olmaydi. Hozircha sentabr oyidan boshlab 2, 3 va 4-bosqich talabalariga o‘qishni onlayn tarzda boshlaymiz, oktabr oyida 1-kurslarni ham qabul qilib olganimizdan keyin pandemiya sal yumshasa, balki, an’anaviy tizimga yana qaytarmiz”, – deb aytgandi.