Yaqinda O‘zbekiston Respublikasi Prezidenti Shavkat Mirziyoyev raisligida jamiyatda ayollar va yoshlarning rolini oshirish hamda bandligini ta’minlash chora-tadbirlari muhokamasi yuzasidan videoselektor yig‘ilishi o‘tkazildi. Unda jamiyatimizda ayollar va yoshlarning rolini oshirish, tadbirkorlikni rivojlantirishlari uchun ularga munosib sharoit yaratib berish masalasiga alohida urg‘u berib o‘tildi.
Albatta, Mikrokreditbank tomonidan ham jamiyatda ayollar va yoshlarning rolini oshirish hamda bandligini ta’minlash sohasida tizimli ishlar amalga oshirilmoqda. Jumladan, Davlat dasturlari va investitsiya loyihalari ijrosi bo‘yicha joriy yilda barcha moliyalashtirish manbalari hisobidan aholi va tadbirkorlik subyektlariga jami 3 trln 572 mlrd so‘m kredit ajratildi. Shundan:
– 659,2 mlrd so‘mi 16 910 nafar yoshning tadbirkorlik faoliyatini yo‘lga qo‘yishga yo‘naltirildi va 18 100 ta ish o‘rni yaratildi.
– 563,2 mlrd so‘mi esa 18 556 nafar ayol tadbirkorlar uchun ajratildi va shu hisobiga 19 400 ta ish o‘rni yaratildi.
Shuningdek, oilaviy tadbirkorlikni rivojlantirish dasturlariga asosan 2020-yilda 1 138 mlrd so‘m imtiyozli kreditlar ajratildi va 44 448 ta ish o‘rni yaratildi. Shundan, birgina “Har bir oila – tadbirkor” davlat dasturi doirasida ajratilgan 879 mlrd so‘mlik imtiyozli kreditlardan 569 mlrd so‘mi 28 122 nafar yoshlar va xotin-qizlar bandligini ta’minlashga yo‘naltirildi.
– Bugungi pandemiya sharoitiga qaramay, xotin-qizlar uchun imtiyozli kreditlar ajratilishi, bizlarni yanada yaxshiroq ishlashga, mas’uliyatliroq bo‘lishga undaydi, – deydi “Gulyurt Art” MChJ rahbari Gulnora Odilova. – Men Shahrisabzdagi milliy hunarmandchilik bo‘yicha loyihamni amalga oshirish uchun “Mikrokreditbank”dan 1 mlrd so‘m imtiyozli kredit oldim va buning natijasida shahrimizdagi, qishloqdagi 45 nafar ishsiz ayolning bandligi ta’minlandi.
Hunarmandchilik sohasida ham 4 081 ta mijozga ajratilgan 126 mlrd so‘m imtiyozli kreditlarning 112 mlrd so‘mi yoki qariyb 89 foizi 3 772 nafar ayol va yosh tadbirkorlarga yo‘naltirilgan. Bundan tashqari, “Yoshlar – kelajagimiz” davlat dasturi bo‘yicha 928 nafar, Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasi mablag‘lari yo‘nalishlarida 443 nafar xotin-qizlar va yoshlar bandligi ta’minlandi.
Masalan, Toshkent viloyati, Toshkent tumanidagi “Bonito Group” MChJ rahbari Saydillo Soliyevning trikotaj mahsulotlari ishlab chiqarish loyihasini moliyalashtirish uchun 1,5 mlrd so‘m kredit ajratildi. Hozirda korxonada 90 nafar ish o‘rni yaratilib, ulardan 61 nafari yoshlardan iborat.
Chust tumani, Tepaqo‘rg‘on MFYda faoliyat ko‘rsatuvchi “Apeks Plast Invest Grup” MChJ rahbari Yusupov Axmadjon Habibjon o‘g‘lining tuxum fleykasi ishlab chiqarish faoliyati uchun 600 mln so‘m kredit ajratildi. Ushbu korxonada jami 20 ta yangi ishchi o‘rini yaratildi, shundan 16 nafari yoshlardan iborat.
Umuman olganda, bankimiz tomonidan 2020-yilning yakuniga qadar, qo‘shimcha ravishda yoshlar va xotin-qizlar tadbirkorligini rivojlantirish uchun 172 mlrd so‘mga yaqin kreditlar ajratilishini ta’minlaymiz.
Mazkur kreditlar samaradorligini oshirish uchun tayyor biznes loyihalarni amalga oshirish, o‘zini-o‘zi band qiladigan 67 ta yo‘nalish bo‘yicha tadbirkorlik faoliyatini yo‘lga qo‘yish uchun kerakli moliyaviy maslahatlar berish tizimi bankning har bir hududiy bo‘linmalarida joriy qilinmoqda.
Bulardan tashqari, Mikrokreditbankka biriktirilgan Quyonchilik sohasini rivojlantirish bo‘yicha olib borilayotgan ishlarga ham yoshlarning qiziqishi ortib boryapti. Bu yo‘nalishda respublikadagi quyonlar sonini 5 milliontaga va vodiy viloyatlarining har birida 1 mln boshga yetkazish bo‘yicha umumiy qiymati 461,4 mlrd so‘mlik 189 ta loyihani shakllantirib, ularni moliyalash manbalarini aniqlab olganmiz. Ushbu loyihalarga bank kreditlari hisobidan 311 mlrd so‘m mablag‘lar yo‘naltiriladi.
Bugungi kunga qadar, 1 438 ta mijozga 131,9 mlrd so‘mdan ziyod kreditlar ajratib berildi, ushbu kreditlar hisobiga hozirda quyonchilik fermalarini tashkil etish, ya’ni mustahkam bazani yaratish ishlari olib borilmoqda.
Bundan tashqari, aholining ehtiyojmand qatlamini moliyaviy qo‘llab-quvvatlash va bandligini ta’minlash sohasida “Temir daftar”ga kiritilgan fuqarolarning 5 859 tasiga 59,9 mlrd so‘m kredit ajratildi. Mazkur sohada ham 2 686 nafar yoshga 28,7 mlrd so‘m va 3 040 nafar ayolga 27,2 mlrd so‘m kredit mablag‘lari ajratildi.
Prezidentimiz tomonidan 2020-yil 13-oktabrda “Aholini tadbirkorlikka jalb qilish tizimini takomillashtirish va tadbirkorlikni rivojlantirishga doir qo‘shimcha chora-tadbirlar to‘g‘risida”gi qaror qabul qilindi.
Endilikda ushbu qarorga muvofiq, yoshlar va xotin-qizlarni kasb-hunar va tadbirkorlik ko‘nikmalariga o‘qitishni davlat tomonidan qo‘llab-quvvatlashning quyidagi tartiblari joriy etiladi:
Tadbirkorlikni rivojlantirish agentligi va Biznes va tadbirkorlik oliy maktabi tomonidan tashkil etilgan o‘quv kurslarini tamomlagan har bir bitiruvchi uchun kasb-hunar va tadbirkorlikka o‘qitish bo‘yicha nodavlat ta’lim tashkilotlariga sarflangan xarajatlarning 70 foizi, biroq har bir bitiruvchiga 1 million so‘mdan ortiq bo‘lmagan miqdori davlat tomonidan kompensatsiya qilinadi;
Ushbu kurslarni muvaffaqiyatli tamomlab, sertifikat olgan shaxslarga o‘z biznesini tashkil etish uchun bank tomonidan mikrokredit ajratiladi.
“Mikrokreditbank” ATB tomonidan nodavlat ta’lim tashkilotlari maxsus sertifikatini olgan, tadbirkorlik tashabbusiga ega jismoniy shaxslar, shu jumladan, yoshlar va xotin-qizlarga o‘z biznesini tashkil etish uchun 33 million so‘mgacha mikrokreditlar ta’minotsiz ajratiladi.
Shuningdek, mikrofirma va kichik korxona ta’sis etgan shaxslarga uchinchi shaxs kafilligi, sug‘urta polislari, kredit hisobiga sotib olinayotgan mol-mulklar garovi, tadbirkorlik faoliyatini qo‘llab-quvvatlash davlat jamg‘armasining kafilligi asosida 225 million so‘mgacha mikrokreditlar ajratiladi. Bunda mikrokreditlar 3 yil muddatgacha 6 oygacha imtiyozli davr bilan Markaziy bankning asosiy stavkasida ajratiladi.
2021-yil 1-yanvarga qadar “Mikrokreditbank”ning aholini, ayniqsa, yoshlar va xotin-qizlarni tadbirkorlikka keng jalb qilish bo‘yicha yangi biznes modeli ishlab chiqiladi.
Mikrokreditbank tadbirkorlarning, xususan, ishbilarmon yoshlar va xotin-qizlarning mana shunday orzu-umidlarini ro‘yobga chiqarish yo‘lida bor imkoniyatlarni ishga solmoqda. Muhimi, buning natijasida ishsizlar ishli bo‘lib, ro‘zg‘orlarga baraka kirmoqda, odamlarning ishbilarmonlik qobiliyati yuzaga chiqayapti.
Bank axborot xizmati
Reklama huquqi asosida
Izoh (0)