Hindistonning Maxarashtra shtati, Satpati qishlog‘i fuqarosi Nitin Patil uzunligi 15 santimetrga yaqin bo‘lgan akula bolasini ovladi. Tutilgan baliq kam uchraydigan — ikki boshli bo‘lgan, deb yozadi “Korrespondent.net”.
Ma’lum qilinishicha, baliqchi akulani suratga olganidan keyin dengizga qo‘yib yuborgan. Patil suratga olgan kadrlarga qarab mutaxassislar baliqning kam uchraydigan anomaliyaga egaligini ta’kidlagan.
Ikki boshli akula Hindistonda kam uchrashi haqida ma’lumot bergan biolog Axilesh mazkur baliq yo sariq qirraburun (Scoliodon), yo bo‘lmasa uzun tumshuqli (Rhizoprionodon) akulaning embrioni bo‘lishi kerakligini taxmin qilgan.
Bundan avval boshi ikkita bo‘lgan uzun tumshuqli akula 1964-yil Gujarotda, ikki boshli sariq qirraburun akula esa 19 yil avval, ya’ni 2001-yilda Karnatakada tutilgan, deyiladi xabarda.
Izoh (0)