Prezident Shavkat Mirziyoyev raisligida oziq-ovqat xavfsizligini ta’minlash va ichki bozorda narx-navo barqarorligini saqlash chora-tadbirlari yuzasidan videoselektor yig‘ilishi o‘tkazilgani haqida xabar berilgandi.
Yig‘ilishda ichki bozorni oziq-ovqat mahsulotlari bilan to‘ldirish, narx-navo barqarorligini saqlash masalalari muhokama qilingan.
“Bugundan barcha choralarni ko‘rib, amaldagi tizimni o‘zgartirmasak, ertaga qish va bahor oylarida qiyin bo‘ladi. Oziq-ovqat mahsulotlarini ko‘paytirib, bozordagi narx-navoni arzon qilsak, odamlarni, ayniqsa, kam ta’minlanganlarni rozi qila olamiz”, – degan Shavkat Mirziyoyev.
Shuningdek, videoselektorda har bir viloyat, tuman va shahar hokimida hudud aholisining keyingi yil maygacha go‘sht, tuxum, un, yog‘, shakar, guruch, kartoshka, sabzi va piyozga bo‘lgan ehtiyoji, bu mahsulotlarni qachon, qayerdan olish bo‘yicha aniq hisob-kitob bo‘lishi kerakligi ta’kidlangan.
“Aholini oziq-ovqat mahsulotlari bilan uzluksiz ta’minlash, narx barqarorligini saqlash bo‘yicha vazifalar belgilab olinishi kerak. Narx-navoning oshishi aholining noroziligiga sabab bo‘lmoqda. Hammasi joylardagi rahbarlarning jilovni bo‘sh qo‘yib, ushbu yo‘nalishdagi ishlarni mukammal yo‘lga qo‘ymaganidan kelib chiqmoqda. Oxirgi uch yil ichida oziq-ovqat, meva-sabzavotchilik va qishloq xo‘jaligining boshqa tarmoqlarini rivojlantirishga 28 trillion so‘m kredit mablag‘i ajratilgan. Bunaqasi tarixda bo‘lmagan. Chorvachilik yo‘nalishining o‘zida 11 trillion so‘mlik loyihalar amalga oshirilgan. Viloyat, tuman, shahar rahbarlari, joylardagi banklarning filiallari rahbarlari 19-oktabrgacha so‘nggi uch yil davomida amalga oshirilgan ishlar haqida mijozbay axborot kiritadi. Oziq-ovqat, ya’ni go‘sht, tuxum, o‘simlik yog‘i va shakar mahsulotlarining narxi keskin o‘zgarishi hudud va sektorlar rahbarlarini qattiq tashvishga solishi kerak edi. Ammo hech bir rahbar bu haqda gapirmayapti, bong urmayapti. Bozorning direktori mahsulot narxini qancha ko‘tarsa, shuncha ko‘p daromad ko‘radi. Bu na prokuratura va na departament nazoratiga olingan? Departament endi oziq-ovqat sanoati va xavfsizligi masalalari bilan shug‘ullanadi. Hamma viloyat hokimlari dushanbagacha qaror qabul qilsin, seshanba yoki chorshanba kuni xalqqa murojaat qilib 2021-yil may oyigacha vaziyat qanday bo‘lishi haqida ma’lumot beradi. Barcha oziq-ovqat mahsulotlarining zaxirasi bo‘lishi kerak, bu davlat siyosatiga aylanishi lozim”, – degan Shavkat Mirziyoyev.
Izoh (0)