Samarqand shahrining Orzu Mahmudov ko‘chasi gastronomik ko‘cha sifatida aholi va sayyohlarga xizmat ko‘rsata boshladi. Bu haqda O‘zA xabar berdi.

Foto: O‘zA

Xabarga ko‘ra ushbu ko‘chada joylashgan kafe va restoranlarda har bir kishi dunyoning turli mamlakatlarida tayyorlanadigan eng mazali, milliy taomlardan bahramand bo‘lishi mumkin. Yo‘l bo‘ylab ko‘plab gastronomik butiklar, savdo va xizmat ko‘rsatish nuqtalari o‘rin olgan.

O‘zAning qayd etishicha, bosh vazir o‘rinbosari, turizmni rivojlantirish qo‘mitasi raisi Aziz Abduhakimov ushbu gastronomik ko‘chani ochar ekan, Samarqand kuni arafasida bu maskan shahar ahli uchun katta tuhfa bo‘lganini ta’kidlagan.

Foto: O‘zA

Foto: O‘zA

“Bu ko‘cha nafaqat ovqatlanish yoki xaridlarni amalga oshirish nuqtasi bo‘ladi, balki turli madaniy, ko‘ngilochar tadbirlar o‘tkaziladigan maskanga aylanadi”, – degan A.Abduhakimov.

Foto: O‘zA

Ma’lumot uchun, ko‘chaning nomi 1959–1964-yillarda Samarqand viloyatiga hokimlik qilgan viloyat kommunistik partiyasi kengashining birinchi kotibi, davlat va siyosat arbobi Orzu Mahmudov sharafiga nomlangan.