Butun dunyo bo‘ylab 2020-yilda yuzaga kelgan koronavirus pandemiyasi sabab yangi inqiroz boshlanishi mumkin. Infeksiya global retsessiyani yuzaga keltirib ulgurgan, endi esa moliyaviy inqiroz sababchisiga aylanishi mumkin. Bu haqda Jahon banki bosh eksperti Karmen Reynxartga tayanib, Bloomberg xabar berdi.
Foto: The Straits Times
“Bu moliyaviy inqiroz sifatida boshlanmagan edi, biroq u jiddiy moliyaviy oqibatlarga ega keng ko‘lamli inqirozga aylandi”, — deydi.
Reynxart o‘z bayonotini G20 davlatlari 15-oktabr kuni koronavirus tufayli dunyoning eng qashshoq mamlakatlari tomonidan qarzlarni to‘lashga o‘rnatilgan moratoriyni yana olti oyga — 2021-yil o‘rtasiga qadar cho‘zishga kelishib olganidan so‘ng bildirgan. Jahon banki ularni moratoriyni bir yilga cho‘zishga chaqirgan.
Tashkilot ma’lumotlariga ko‘ra, 2020-yilda qashshoq mamlakatlar to‘lashi kerak bo‘lgan to‘lovlarning 60 foizi Xitoy hisobiga to‘g‘ri kelmoqda. Pekin rivojlanayotgan mamlakatga ko‘plab zayomlarni noshaffof usullarda va yuqori foizlarda taqdim etgan. Reynxartning ta’kidlashicha, Xitoy qashshoq davlatlarning qarzlarini qaytarishni yengillashtirish dasturida qisman ishtirok etmoqda. Mazkur tashabbusga Xitoyning Taraqqiyot davlat banki va xususiy kreditorlar qo‘shilmagan. Biroq 16-oktabr kuni Xitoy markaziy banki G20 taklifini qo‘llab-quvvatlashga qaror qilgani ma’lum bo‘ldi.
Eslatib o‘tamiz, shu yilning mart oyida Xalqaro valyuta jamg‘armasi 2020-yilda jahon iqtisodiyoti 2008—2009-yillardagi global moliyaviy inqiroz davridagiga qaraganda chuqurroq pasayishi mumkinligini bildirgan.
