Janubiy Koreya hududida tashkil etilgan va rasmiy ro‘yxatdan o‘tgan Koreyadagi o‘zbekistonliklar uyushmasi faollarining birinchi onlayn-videokonferensiyasi o‘tkazildi, deb xabar bermoqda “Dunyo” axborot agentligi.

Foto: “Dunyo” axborot agentligi

O‘zbekiston elchixonasi ko‘magida tashkil etilgan mazkur konferensiyada yangi uyushmaning tashkilotchilari va faollari 2020-yil 31-oktabr kuni mazkur jamoatchilik tashkilotining rasmiy ochilish marosimini o‘tkazish va boshqa tashkiliy masalalarni muhokama qildi.

Onlayn-anjumanda, shuningdek, uyushmaning istiqboldagi vazifalari, uning faoliyati doirasida muhokama qilinadigan muhim masalalar, jumladan keng jamoatchilik e’tiboriga molik bo‘lgan ijtimoiy va moliyaviy ko‘mak loyihalarini amalga oshirish kabi vazifalar yuzasidan atroflicha fikr almashildi.

Ishtirokchilar yangi tashkil etilgan Koreyadagi o‘zbekistonliklar uyushmasi o‘z faoliyatini Janubiy Koreya hududida vaqtincha mehnat faoliyatini yuritayotgan vatandoshlar, talabalar, tadbirkorlar, doimiy yashayotgan hamda boshqa maqsadlarda bo‘lib turgan yurtdoshlarimizning manfaatlarini himoya qilishga qaratishini ta’kidladi.

Shuningdek, uyushma favqulodda holatlarda tezkor yordam ko‘rsatish, tibbiy va huquqiy maslahatlar bera olish imkoniyatlariga ega bo‘lishi zarurligi aytib o‘tildi. Bu borada Janubiy Koreyadagi vatandoshlar o‘z bilim va tajribalari bilan amaliy yordam ko‘rsatish hamda moddiy qo‘llab-quvvatlashda faol qatnashishini bildirdi.

Onlayn-videokonferensiyada O‘zbekistonning Seuldagi elchixona xodimlari ishtirok etib, uyushmaning boshqaruv organi va faollari oldida katta mas’uliyatli vazifalar turganini ta’kidladi.

Avvalroq O‘zbekistonning Seuldagi elchixonasi “Oltin daftar”iga kiritilgan vatandoshlar soni yuz kishidan oshgani xabar qilingandi.