Chevrolet Corvette’ni yaratgan dizaynerga tegishli 67 yoshli Fiat rekord narxda sotuvga qo‘yiladi (foto)

Yaqin kunlar ichida RM Sotheby’s auksioni orqali 1953-yilda ishlab chiqarilgan noyob Fiat 8V Supersonic by Ghia sotuvga qo‘yiladi. Tashkilotchilar original Chevrolet Corvette yaratuvchisi Genri Lauv birinchi bor egalik qilgan avtomobilni 1,75 million dollarga sotishni rejalashtirmoqda, deb xabar beradi Motor.

Fiat 8V Supersonic by Ghia kupesi ilk bor 1952-yili Jeneva avtosalonida taqdim etilgan. Ikki eshikli mashina avtomobil ko‘rgazmasining haqiqiy yangiligiga aylangan. Sportkar Ikkinchi jahon urushidan so‘ng asosan hamyonbop avtomobillarni ishlab chiqarish bilan shug‘ullangan Italiya markasining barcha modellaridan farq qilgan.

Avtomobilsozlik kompaniyasi mazkur Fiat 8V’dan jami 114 nusxa yaratgan. 105 ot kuchini taqdim etishga qodir 2,0 litrli V8 bilan jihozlangan sportkar poygalar uchun mo‘ljallangan. Konveyrdan chiqqan har bir modelning kuzovi Yevropaning turli atelyelarida tayyorlangan. 40 ga yaqin kupe Turindagi Ghia firmasi bilan hamkorlikda yaratilgan. 15 modelning eksteryerini loyihalashda esa italiyalik afsonaviy dizayner Jovanni Savonutssi ishtirok etgan. Har bir nusxa qaysidir jihatlari bilan bir-biridan farq qiladi, shu sababli barcha avtomobillarni yagona nusxadagi deb atash mumkin.

Sotuvga qo‘yilgan Fiat 8V’ni 1953-yilda Chevrolet Corvette yaratuvchilaridan biri hisoblangan General Motors dizayneri Genri Lauv sotib olgan. U noyob sportkardan har kuni foydalangan, shu sababli mashinaning dvigateli bir necha bor almashtirilgan. Bir safar Genri Italiyadan original motorning kelishini kutib o‘tirmay, sportkarga Chevrolet’ning V8 4,3 dvigatelini o‘rnatgan. Ushbu dvigatel hozirgi kunga qadar Fiat’ni harakatga keltirishga xizmat qilmoqda.

Auksion tashkilotchilarining ta’kidlashicha, 67 yoshli sportkar ideal holatda saqlangan bo‘lib, uni 1,75 milliondan 2,2 million dollar oralig‘ida sotish rejalashtirilmoqda. Agarda bu amalga oshsa, mazkur nusxa tarixdagi eng qimmat Fiat’ga aylanadi. Bundan oldingi rekord 1953-yilgi Fiat 8V Supersonic Ghia tomonidan 2017-yilda o‘rnatilgan edi. O‘shanda model 1,375 million dollarga sotilgan.