O‘zbekistonlik yarim himoyachi Oston O‘runov “Spartak”ning Rossiya Premyer Ligasi 11-turi doirasida “Ximki”ga qarshi kechadigan o‘yinida maydonga tusha olmaydi.
Moskvaliklar ustozi Domeniko Tedeskoning ma’lum qilishicha, O‘runovning son mushaklarida shikastlanish bor. Shuningdek, “Ximki”ga qarshi bahsni Georgiy Jikiya ham o‘tkazib yuboradi. Futbolchi ayni damda karantinda bo‘lib turibdi.
Eslatib o‘tamiz, O‘runov O‘zbekiston terma jamoasining oktabr oyidagi yig‘iniga jalb etilgan, biroq eski jarohatining qaytalagani sabab yig‘inni erta tark etgandi.
19 yoshli O‘runov RPL 2020/21-yilgi mavsumida beshta o‘yinda maydonga tushib, ikkita sariq kartochka oldi.
“Spartak”ning “Ximki”ga qarshi o‘yini 17-oktabr, shanba kuni soat 21:00 da boshlanadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)