Germaniyaning imkoniyatlari cheksiz emas, va uning iqtisodiyoti koronavirus tarqalishi oqibatida bahorda hukumat tomonidan joriy qilishga majbur bo‘lingan cheklovlarni takrorlashga tayyor emas. Bu haqda Germaniya kansleri Angela Merkel federal o‘lkalar bosh vazirlari bilan uchrashuv yakunlari bo‘yicha matbuot anjumanida aytib o‘tdi, deb yozadi “RBK”.
Uning eslatishicha, Germaniya qabul qilgan budjet faqat shu yilning o‘zida 250 milliard yevro miqdoridagi qarzdorlikni nazarda tutadi. “Shu tufayli biz koronavirusning bahordagidek, xuddi shunday iqtisodiy oqibatlarni keltirib chiqaruvchi ikkinchi to‘lqinini o‘zimizga ep ko‘ra olmaymiz”, — dedi u.
Kansler qayd etishicha, mamlakat kasallanganlar sonining eksponensial o‘sishi bosqichida bo‘lib, to‘lqinni pasaytirish uchun bor kuchini ishga solishi kerak. “Yaqin kunlar va haftalarda ko‘radigan choralarimiz biz pandemiyani qanday yengib o‘tishimizda hal qiluvchi ahamiyatga ega bo‘ladi. Kasallanganlar sonini nazorat qilish va ularning boshqalar bilan kontaktlarini aniqlash uchun qo‘ldan kelgancha harakat qilish kerak”, — dedi Merkel.
Yig‘ilishda kansler va bosh vazirlar kasallanish holatlari o‘sishda davom etgan taqdirda qanday cheklovlar kiritilishi haqida kelishib oldi. Eng murakkab epidemiologik vaziyatga ega hududlarda (yetti kun ichida 100 ming aholiga 50 ta kasallanish holati) o‘n nafardan ortiq kishining to‘planishi taqiqlanadi. Bunday joylarda pab va restoranlar faqat 23:00 gacha ishlaydi, shuningdek, jamoat joylarida niqob taqish talablari kuchaytirilishi mumkin.
Germaniyaning ba’zi shaharlarida, shu jumladan, Berlinda allaqachon kuchaytirilgan xavfsizlik choralari amal qilmoqda. O‘tgan haftadan boshlab do‘konlar, barlar, restoranlar va klublarning 23:00 dan 6:00 gacha ish rejimi cheklandi. O‘n nafardan ortiq kishi ishtirokida tadbirlar o‘tkazish taqiqlandi. Cheklovlar 31-oktabrgacha amal qiladi.
Izoh (0)