Farg‘onada shlagbaumni aylanib o‘tmoqchi bo‘lgan yuk mashinasi poyezd bilan to‘qnashdi. Haydovchi voqea joyida vafot etdi

Farg‘onada yuk mashinasi poyezdga urilishi oqibatida yo‘l-transport hodisasi sodir bo‘ldi, deya xabar bermoqda O‘zbekiston temir yo‘llari axborot xizmati.

Qayd etilishicha, Farg‘ona viloyatida 13-oktabr kuni GAZ-53 rusumli yuk mashinasi harakatlanayotgan 62-sonli Toshkent– Andijon yo‘lovchi poyezdining teplovoziga borib urilgan.

Hodisa soat 21:40 da Buvayda va Qo‘qon stansiyalari o‘rtasidagi temiryo‘l kesishmasida sodir bo‘lgan. Aniqlanishicha, avtomobil haydovchisi tushirilgan shlagbaumni aylanib o‘tib, yo‘l harakati qoidasini buzgan.

To‘qnashuv natijasida yuk mashinasining kabinasi jiddiy zarar ko‘rgan. Tan-jarohatlari olgan haydovchi voqea joyida vafot etgan.

Ma’lum qilinishicha, lokomotiv va poyezdning birinchi vagoniga ham zarar yetgan. Yo‘lovchilar orasida jarohat olganlar yo‘q.

Zarar ko‘rgan lokomotiv Qo‘qon lokomotiv deposiga yetkazildi. Poyezd manzilga boshqa elektrovoz orqali yetkazib berildi. Hodisa tufayli poyezd 42 daqiqaga kechiktirildi.

Hodisa yuzasidan huquqni muhofaza qilish organlari va boshqa idoralar tergov olib bormoqda.

Avvalroq Andijonda Damas yuk mashinasiga urilishi oqibatida voyaga yetmagan yo‘lovchi halok bo‘lgani xabar qilingandi.