Tojikistonning amaldagi prezidenti Emomali Rahmon 11-oktabr, yakshanba kuni bo‘lib o‘tgan respublika rahbarligiga saylovlarda ovozlarning 90,92 foizini to‘pladi, deb xabar beradi “RIA Novosti”.
Respublika Markaziy saylov komissiyasi raisi Baxtiyor Xudoyorzodaning aytishicha, ovoz berishda saylovchilarning 85,39 foizi qatnashgan.
Prezident lavozimi uchun besh nomzod kurash olib bordi, ularning barchasi siyosiy kuchlar yetakchilaridir, bular — amaldagi prezident Emomali Rahmon (hukmron Xalq-demokratik partiyasi), deputat Miroj Abdulloyev (Kommunistik partiya), deputat Rustam Latifzoda (Agrar partiya), deputat Rustam Rahmatzoda (Iqtisodiy islohotlar partiyasi) va deputat Abduhalim G‘afforzoda (Sotsialistik partiya).
1992-yildan buyon mamlakatni boshqarib kelayotgan (sovet davridan keyingi mamlakatlardagi eng uzoq davom etayotgan muddat) Rahmon uchun bu beshinchi saylovlardir.
Saylovlarning borishini YeXHT, MDH Parlamentlararo assambleyasi, MDH Ijroqo‘mi, ShHT, shuningdek, Rossiya va O‘zbekistondan borgan 122 nafar xalqaro kuzatuvchilar nazorat qildi. Qoidabuzarliklar aniqlanmadi.
Eslatib o‘tamiz, Shavkat Mirziyoyev 5-oktabr kuni Tojikiston prezidenti Emomali Rahmon bilan telefon orqali muloqot qilib, bo‘lajak prezidentlik saylovlarida muvaffaqiyat tilagan edi.
Izoh (0)