Armaniston va Ozarbayjon Moskvada o‘tkazilgan ko‘p soatlik muzokaralardan so‘ng 10-oktabr kuni soat 12:00 dan boshlab o‘t ochishni to‘xtatishga kelishib oldi, deb xabar bermoqda “Interfaks”.
Qayd etilishicha, tomonlar to‘rtta band bo‘yicha kelishib oldi:
- Harbiy asirlarni va ushlab turilgan boshqa shaxslarni hamda halok bo‘lganlarning jasadlarini almashtirish va Xalqaro qizil xoch mezonlariga muvofiq gumanitar maqsadlarda 2020-yil 10-oktabr soat 12:00 dan boshlab o‘t ochish to‘xtatiladi.
- O‘t ochishni to‘xtatish tartibining konkret parametrlari qo‘shimcha ravishda kelishib olinadi.
- Ozarbayjon va Armaniston YEXHT Minsk guruhi hamraislari vositachiligida kelishuvning asosiy tamoyillari asosida imkon qadar tezroq tinch yo‘l bilan kelishuvga erishish maqsadida muzokaralarni boshlaydi.
- Tomonlar muzokara jarayonining shakli o‘zgarmasligini tasdiqlaydi.
Armaniston, Ozarbayjon va Rossiya tashqi ishlar vazirlari o‘rtasidagi muzokaralar 9-oktabr kuni Moskvada boshlanib, 10-oktabr oqshomida yakunlandi. U 10 soatdan ortiq vaqt davom etdi.
Armaniston va Ozarbayjon tashqi ishlar vazirlari Zohrab Mnatsakanyan va Jayhun Bayramov Rossiya prezidenti Vladimir Putinning taklifiga binoan 9-oktabr kuni Moskvaga keldi.
Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Bu mintaqadagi so‘nggi o‘n yillikda kuzatilgan eng jiddiy to‘qnashuv bo‘lmoqda.
8-oktabr kuni Jenevada Yevropada xavfsizlik va hamkorlik tashkilotining Minsk guruhi hamraislari — Rossiya, AQSh va Fransiya Tog‘li Qorabog‘dagi nizoni hal qilish bo‘yicha muzokaralar o‘tkazishni boshladi. Unda Ozarbayjon TIV rahbari Jayhun Bayramov ham qatnashdi.
Avvalroq Rossiya, AQSh va Fransiya prezidentlari Vladimir Putin, Donald Tramp va Emmanuel Makron Tog’li Qorabog‘ hududida davom etayotgan jangovar harakatlarni zudlik bilan to‘xtatishni talab qilgandi.
Izoh (0)