Qimmatbaho taqinchoqlar, bejirim tillaqosh va malikaga aylantirib qo‘yuvchi chiroyli ko‘ylak … Har bir ayol xuddi ertaklardagi kabi sehrli libosni kiyishni orzu qiladi. Xo‘sh, bunday baxtli lahzalarni his qilgan aktrisalar suratga olish jarayonini qanday yodga oladi? Shuningdek, liboslarning har bir detali haqida batafsil tanishishni istaysizmi? Quyidagi qiziqarli ma’lumotlar aynan shu haqda.
“Oppog‘oy va ovchi – 2” − Sharliz Teron
Liboslar bo‘yicha dizayner: Kollin Etvud
Ushbu film avvalgi “Oppog‘oy va ovchi” singari nafaqat afsonaviy, balki dizayner Kollin Etvud tomonidan yaratilgan zamonaviy liboslar tufayli ham e’tiborga loyiqdir. To‘g‘ri, birinchi qism hatto libos jihatidan ham ancha ishonchli ko‘rinadi – malika Rovenni obrazi mazmun jihatidan ancha zamonaviy va mulohazali. Ammo birgina lenta juda o‘xshash, ikkala filmda ham Sharliz Teron hayratda qoldiradigan qarg‘a patlaridan iborat qora plashda namoyon bo‘ladi. Aynan shu libosni aktrisa film davomida ham o‘zgartirmaydi.
Liboslar bo‘yicha dizayner Etvudning so‘zlariga ko‘ra, ko‘ylak juda og‘ir – suratga olish jarayonida Sharliz bir necha daqiqalik tanaffus qilib, toza havoda nafas olish uchun chiqar edi. Shuningdek, ushbu san’at asarini yaratish ham oson kechmagan, tikuvchilar har bir patni qo‘l mehnati yordamida amalga oshirgan. Libos tayyor bo‘lishi uchun taxminan 2 hafta, moddiy tomondan esa 30 000 dollar sarflangan.
“Zolushka” − Lili Jeyms
Liboslar bo‘yicha dizayner: Sendi Pauell
“Malika” bo‘lishni orzu qilganlar ishni, albatta, 2015-yil suratga olingan “Zolushka” filmidagi havorang libosni kiyishdan boshlash kerak. Chindan ham mo‘jizaning o‘zginasi. Ushbu ertakona libosni yaratish uchun dizayner Sendi Pauellga taxminan 4000 soat vaqt kerak bo‘ldi. Shuningdek, filmda har bir sahna uchun turli xil ko‘rinishdagi liboslar yaratilgan. Hammasi bo‘lib ular 8 tani tashkil etadi. Ularning har biriga, taxminan, 12 ming dollar, 250 metrdan mato va 5 kilometr uzunlikda ip sarflangan.
Film qahramoni Lili Jeyms uchun tanlangan liboslar bir-biridan unchalik farq qilmas edi, chunki libosning korset va chambarakli keng yubka qismi po‘latdan ishlangan edi. Aktrisa har safar uni kiyish uchun 25 daqiqa vaqt sarflar edi. Shuningdek, liboslar aktrisaning nafas olishiga biroz to‘sqinlik qilar, ammo Zolushka hech qanday qo‘shimcha effektlarsiz ham mukammal ko‘rinishda bo‘lishi kerak edi. Lilining so‘zlariga ko‘ra, uning uchun eng qiyini shahzoda bilan balda raqs tushish sahnasi bo‘lgan. Sababi shahzoda har safar uning etagini bosib olar va bunga qo‘shimcha qilingan dubl esa “sehrli” libosda o‘tishi qiyin bo‘layotgan vaqtni daqiqa, hatto soatlarga ham uzaytirgandek tuyulgan.
“Oppog‘oy: Gnomlarning qasosi” – Juliya Roberts
Liboslar bo‘yicha dizayner: Eyko Ishioki
Ushbu film uchun liboslar afsonaviy dizayner Eyko Ishioki tomonidan yaratilgan. Uning mohir qo‘llari tufayli qirolichaning garderobida Juliya san’at asari deb ataydigan bir necha zamonaviy liboslar paydo bo‘ldi. Ammo film borasida aktrisaga berilgan suratga olish ishlarining eng qiyin bosqichi haqidagi savolga: “Mening to‘y libosim”, deya javob berdi.
Qirolicha Klementinaning to‘y libosi 25 kilogramm va diametri 2,4 metrni tashkil etadi. Ushbu libosni kiyish uchun aktrisa har safar juda ko‘p vaqt sarflagan, shuningdek, unga bir nechta odam yordam ham bergan. Dizayner qirolichaning garderobini to‘ldirgan boshqa liboslar ham juda og‘ir bo‘lgan, ammo aktrisaning yodida aynan shu libos qolgan. Hatto yulduzning shaxsiy yordamchisi ham filmni suratga olish jarayoniga izoh berarkan, to‘y sahnasi jarayoni Juliyani chindan ham charchatganini ta’kidlagan.
“Alisa mo‘jizalar mamlakatida” – Xelena Bonem Karter
Liboslar bo‘yicha dizayner: Kollin Etvud
Tim Bertonning “Alisa” filmida rol ijro etgan Mia Vasikovskaning qahramoni azob chekishi kerak emas edi. Ammo o‘sha paytdagi qiyinchiliklar rejissorning rafiqasi Xelena Bonem Karterga nasib etdi. U Qizil malika rolini ijro etdi. Muammo shundaki, rejissor Bertonning g‘oyasiga ko‘ra, qahramon qandaydir xunuk ko‘rinishga ega bo‘lishi kerak edi. Masalan, boshi haddan ortiq katta bo‘lishi mumkin. Ushbu ko‘rinishni hosil qilishda kompyuter daholari harakat qildi, shuningdek, ular bilan birga libos bo‘yicha dizaynerlar ham o‘z hissalarini qo‘shish kerak edi.
Bosh nisbatan kattaroq ko‘rinishi uchun tanani iloji boricha kichkina ko‘rsatishga to‘g‘ri kelgan. O‘sha paytda Karter 47 yosh bo‘lishiga qaramay, chiroyli qomat egasi edi. Ammo bu ish korsetsiz bitmadi, aktrisaning beli shu darajada siqilgan ediki, u hatto nafas olib, chiqara olmasdi. Yulduzning so‘zlariga ko‘ra, u korset kiyishda bebaho tajriba orttirgan. Keyinchalik 2015-yilda “Zolushka” filmidagi ishtirokidan so‘ng Lili Jeymsga o‘zining sirini o‘rgatdi. Xelena keyinchalik qovurg‘alar og‘rimasligi uchun korset iplari bog‘langanda qanday qilib nafas olishni ko‘rsatdi.
“Aka-uka Grimmlar” – Monika Belluchchi
Liboslar bo‘yicha dizayner: Gabriella Piskuchchi
Terri Gilliamning ertagida Monika Belluchchi jodugar rolini o‘ynadi, uning prototipi qonli grafinya Yelizaveta Batori edi, u afsonaga ko‘ra o‘z yoshligini saqlab qolishi uchun yosh qizlarning qonini ichgan. Shuning uchun Monikaning obraz tasvirlari qirmizi-qizil ranglarda yaratilgan. Jodugarning baxmal ko‘ylagi o‘rta asr kiyimiga o‘xshasa-da, ammo asl bezaklar bilan bezatilgan.
Parcha va baxmal matolardan tikilgan libos juda og‘ir bo‘lib, libosning uzun shleyfi aktrisaning suratga olish maydonchasida harakatlanishida xalaqit berardi. Ammo undan ko‘proq qiyinchilik tug‘dirgan masala qahramonning aksessuarlari bo‘ldi. Jodugarning toji va ziraklari chindan ham og‘ir edi. Gabriella Piskuchchining izlanishiga qaramay, boshdagi bezakni yengillashtirishning iloji bo‘lmadi. Toj bilan bog‘liq sahnalar, albatta, bir qancha tanaffus talab etgan. Ammo dizayner ziraklar uchun ajoyib hiyla o‘ylab topgan, keyinchalik ular avvalgidek aktrisaning quloqlariga og‘irlik qilmadi.
Izoh (0)